धनुषामा इनार सफा गर्न पसेका एक पुरुषको निसास्सिएर मृत्यु

धनुषामा इनार सफा गर्ने क्रममा एक जना निसास्सिएर मृत्यु भएको छ। ४० मिटर गहिरो इनार सफा गर्न पसेका गणेशमान चारनाथ नगरपालिका-४ बस्ने ३० वर्षीय रामप्रसाद शर्माको मृत्यु भएको हो।

सशस्त्र प्रहरी उपरीक्षक दर्शन गिरिका अनुसार उनी बुधबार बिहान सोही नगरपालिका-४ भरतपुरस्थित उदगारी यादवको इनार सफा गर्न इनार भित्र पसेका थिए। सोही क्रममा निसास्सिएर उनको मृत्यु भएको हो।

घटनाबारे प्रहरीलाई खबर प्राप्त भएपछि सुरक्षा वेश रघुनाथपुर र धनुषा गण नम्बर-८ बाट खटिएको ४ जना गोताखोरसहित ११ जनाको विपद् उद्धार टोली घटना स्थलमा पुगेको थियो।

सो टोलीले उनको शव इनारबाट निकाली पोष्टमार्टमका लागि प्रादेशिक अस्पताल जनकपुर पठाइको छ। घटना सम्बन्धमा थप अनुसन्धान भइरहेको प्रहरीले जनाएको छ।

सशस्त्र प्रहरीको सहयोगमा यसरी निकालिएको थियो रामप्रसाद शर्माको शव : (तस्बिरहरु)