बज्जिका भाषाको पहिलो महाकाव्य ‘बुद्ध’ सार्वजनिक

बज्जिका भाषाका प्रथम कवि तथा बज्जिका शिरोमणि सञ्जय साह मित्रद्वारा लिखित ‘बुद्ध’ महाकाव्य सार्वजनिक गरिएको हो।

बुद्ध जयन्तीको अवसर पारेर बुधबार रौतहटमा आयोजित एक समारोहमा महाकाव्य ‘बुद्ध’ सार्वजनिक गरिएको हाे। नेपालमा बज्जिका भाषा लिखित यो नै पहिलो महाकाव्य हाे।

नेपालको छैटौँ र मधेश प्रदेशको तेस्रो ठुलो भाषाको रुपमा रहेको बज्जिका भाषामा नेपालबाट पहिलो महाकाव्य प्रकाशन भएकोमा समारोहमा उपस्थित वक्ताहरूले खुसीयाली प्रकट गरेका थिए।

भगवान् गौतम बुद्धको जीवनीमा आधारित रहेर ५५ भागमा विभाजन गरी २४० पृष्ठमा रचित महाकाव्यले बज्जिका भाषाको विकासमा अत्यन्त महत्त्वपूर्ण भूमिकामा रहने तथा बज्जिका भाषीबिच भगवान् बुद्धलाई चिनाउन महत्त्वपूर्ण योगदान पुग्ने वक्ताहरूले बताएका छन्।

महाकाव्य नेपाली झ्याउरे लोक छन्दमा लेखिएको छ। कार्यक्रमलाई सम्बोधन गर्दै कृतिकार मित्रले आफ्नो नयाँ कृति पाठकहरूलाई मन पर्ने विश्वास व्यक्त गरे।

मित्रले नेपाली र बज्जिका भाषामा साहित्य तथा व्याकरण, इतिहास, अनुवाद तथा अनुसन्धान र पाठ्यपुस्तकसम्बन्धी २० कृति प्रकाशन गरिसकेका छन्। मित्र तीन दशकदेखि लेखन कार्यमा सक्रिय छन्।