नेपाली राष्ट्रिय फुटबल टोलीका सदस्य रोहित चन्दको आरसी ३२ फुटबल एकेडेमी जारी सहिद स्मारक ‘सी’ डिभिजन लिगको अंकतालिकामा शीर्ष स्थानमा उक्लिएको छ।
शुक्रबार मनोहरा युनाइटेड युवा क्लबमाथि २–१ को जित निकाल्दै आरसी ३२ लिगको शीर्ष स्थानमा उक्लिएको हो। सातदोबाटोस्थित एन्फा कम्प्लेक्स मैदानमा आरसी ३२ को जितमा आशिष लावती र किस्मत लिम्बुले गोल गरे। मनोहराका उत्तम शाहीले एक गोल फर्काए।
यो जितसँगै आरसी ३२ ले १० खेलबाट २२ अंक जोडेको छ। पराजित मनोहरा समान खेलबाट १४ अंकका साथ पाँचौं स्थानमा छ। यो खेलसँगै दशौं चरणको खेल सुरु भएको छ। ९ खेल मात्र खेलेका बाग्मती २० अंकका साथ दोस्रोमा र पुल्चोक १९ अंकका साथ तेस्रो स्थानमा छन्।
एक खेल कम खेलेका बाग्मती र पुल्चोकसँग दशौं चरणमा जित निकाल्दै शीर्ष स्थानमा उक्लिने अवसर छ। समान ९ खेलबाट समाज कल्याण १६ अंक जोड्दै चौथो स्थानमा छ। त्यसअघि शुक्रबार आरसी ३२ ले सुरुआतमा अग्रता लिँदै मनोहरामाथि दबाब बनाएको थियो।
खेलको २०औं मिनेटमा आशिषको गोल गर्दै आरसी ३२ लाई अग्रता दिलाएका हुन्। त्यो गोलसँगै आरसी ३२ पहिलो हाफमा १–० ले अगाडि रह्यो। दोस्रो हाफमा पनि आरसी ३२ ले दोस्रो गोल थप्दै अग्रता बढायो।
६७औं मिनेटमा किस्मतले गोल गर्दै टोलीको अग्रता दोब्बर बनाएका हुन्। उनले मनोहराका गोलकिपर समीर विष्ट अगाडि बढेको अवस्था सदुपयोग गरेका थिए। यस क्रममा उनले पेनाल्टी बक्सबाहिरबाट गोल गरे। आरसी ३२ क्लिन सिटनजिक पुगेको थियो।
तर इन्जुरी समयमा मनोहराले गोल फर्कायो। उत्तमले गोल गर्दै मनोहरालाई खेलमा फर्काउन प्रयास गरे। तर, त्यो पर्याप्त हुन सकेन। उनले आविष्कार खड्काको पासलाई नियन्त्रणमा लिँदै पेनाल्टी बक्सबाहिरबाट उत्कृष्ट गोल गरे।
आविष्कार जारी लिगमा मनोहराका लागि सर्वाधिक गोलकर्ता (चार) हुन्। जारी लिगमा पुलचोकका लागि श्यरब लो तामाङ सर्वाधिक गोलकर्ताको सूचीमा शीर्ष स्थानमा छन्। उनकै आठ गोल प्रेरणामा पुलचोकले शीर्षताको होडमा दाबेदारी दिइरहेको छ।
सर्वाधिक गोलकर्ताको सूचीमा समाज कल्याणका रोशन क्षेत्री (६ गोल), सानेपामा पेम्बा दोर्जे (५ गोल), पुलचोककै खेलाडीद्वय सागर थिङ र सुमन श्रेष्ठले समान पाँच गोल गरेका छन्।
Leave a Reply