हात हातमा संविधान बोकेर निस्किँदै कांग्रेस

नेपाली कांग्रेसले असोज ३ गते संविधान दिवस देशभर मनाउने निर्णय गरेको छ। संविधान दिवसकाे अवसरमा हात हातमा संविधान बाेकेर सडकमा निस्कने बताएका छन् । नेपाली काँग्रेसका उपसभापति पूर्णबहादुर खड्काले ७७ वटै जिल्लामा संविधानको रक्षार्थ हात हातमा संविधान लिएर प्रदर्शन गर्न निर्देशन भएको बताएका हुन।

‘असोज ३ गते ७७ वटै जिल्लामा, देशबाहिर पनि जुनजुन देशमा छौं, पार्टीका कमिटी, भातृ संस्था, शुभेच्छुक संस्था सबैलाई अनुरोध गरिसकेका छौं,’ बुधबार सानेपास्थित केन्द्रीय कार्यालयको अवलोकन गर्न पुगेका उपसभापति खड्काले पत्रकारसँग कुराकानी गर्दै भने, ‘सबैले संयुक्त रूपमा ७७ वटै जिल्लामा शान्तिपूर्ण तरिकाले संविधान हातमा लिएर हामीले संविधान दिवस मनाउने निर्देशन गरिसकेका छौं।’

पार्टीको कार्यसम्पादन समितिको बैठकबाट संविधान दिवस मनाउने निर्णय भएको पनि उनले बताए। ‘संविधान दिवस अत्यन्त संयमिततापूर्वक, दृढतापूर्वक संविधान रक्षाको केन्द्रीय जिम्मेवारीलाई शिरमा राखेर संविधान दिवस मनाउने निर्णय भएको छ,’ उपसभापति खड्काले भने।