एनएसएसएफ र रेडियन्टबीच सहकार्य

नेपाल विद्यालय खेलकुद महासंघ (एनएसएसएफ) र रेडियन्ट रिडर्स एकेडेमीले विद्यालय खेलकुदको विकास र प्रवर्द्धनमा सहकार्य गर्ने भएका छन्।

ललितपुरको सानेपास्थित रेडियन्ट रिडर्स एकेडेमीले शुक्रबार नेपाल विद्यालय खेलकुद महासंघ (एनएसएसएफ) सँग शुक्रबार सम्झौता गरेको हो। रेडियन्टका संस्थापक प्रिन्सिपल डिके ढुंगाना र एनएसएसएफका महासचिवसमेत रहेका अन्तर्राष्ट्रिय विद्यालय खेलकुद महासंघ (आइएसएफ) का कार्यकारी सदस्य राजकुमार कार्कीले सम्झौतापत्रमा हस्ताक्षर गरे।

सम्झौतासँगै रेडिअन्टले आइएसएफको स्वीकृतिमा एनएसएसएफको आधिकारिक सदस्यताको मान्यता पाएको छ। सम्झौताअनुसार रेडियन्टले आइएसएफको खेलकुद गतिविधिका साथै शैक्षिक र सांस्कृतिक कार्यक्रमका लागि विश्वव्यापी मञ्च पाउने भएको छ।

आइएसएफको अन्तर्राष्ट्रिय प्रतियोगितामा प्रथम पक्ष एनएसएसएफमार्फत सीधै सहभागी हुन पाउने, आइएसएफको अन्तर्राष्ट्रिय मञ्चमा विद्यालयको झन्डा र लोगो प्रयोग गर्न पाउने, आइएसएफ र एसियाली विद्यालय खेलकुद महासंघ (एएसएसएफ) को साधारण सभामा एनएसएसएफको प्रतिनिधिसँगै सहभागी हुन पाउने र विद्यालय खेलकुदको गतिविधि प्रवद्र्धनमा क्रियाशील हुनुपर्ने लगायत विषयवस्तु सम्झौतापत्रमा समावेश छन्।

सम्झौता तीन वर्षसम्म कायम रहने भएको छ। सम्झौतापछि महासचिव कार्कीले आइएसएफबाट स्वीकृति प्राप्त सदस्यता आबद्धताको प्रमाणपत्र संस्थापक प्रिन्सिपल ढुंगानालाई हस्तान्तरण गरेका थिए।

महासचिव कार्कीले एनएसएसएफसँग आबद्ध भएको विद्यालय परिवारलाई धन्यवाद दिँदै आबद्धताले खेलकुदका अलावा आइएसएफको विभिन्न सोलिडारिटी परियोजनामा पनि सहभागी हुन पाउने बताए।

एकेडेमीका संस्थापक प्रिन्सिपल ढुंगानाले विभिन्न अन्तर्राष्ट्रिय शैक्षिक संस्थासँग आबद्ध भए पनि खेलकुदको अन्तर्राष्ट्रिय संस्थासँग रेडियन्ट पहिलो पटक आबद्ध भएको जानकारी गराए।