भौतिक पूर्वाधार मन्त्रीलाई बालेनको ‘एक ट्रक धुलो उपहार’

काठमाडौं महानगरपालिका प्रमुख बालेन्द्र साह (बालेन) ले विगत १५ वर्षदेखि चक्रपथ विस्तार अन्तर्गतकाे दोस्रो खण्ड (कलंकी- बसुन्धरा) विस्तारको नाममा काठमाडौंका जनताले धुलो र कष्ट बेहोर्नु परेको भन्दै भौतिक पूर्वाधार तथा यातायात मन्त्री रघुवीर महासेठलाई ‘एक ट्रक धुलो उपहार’ पठाएका छन्।

शनिबार यसको विरोध गर्दै उनले भौतिक पूर्वाधार तथा यातायात मन्त्रालय अन्तर्गतकाे सडक विभाग र सडक डिभिजन काठमाडौं अगाडि एक-एक ट्रक धुलो खन्याएका हुन्।

मन्त्रालयको कमजोरीका कारण काठमाडौं महानगरले गाली खान परेको बताउँदै उनले यथाशीघ्र काम अगाडि बढाउन चेतावनी दिए।

उनले सामाजिक सञ्जाल मार्फत भनेका छन् ‘यो धुलो जनताले मात्र खाँदा राम्रो देखिँदैन। जबसम्म तपाईँ काम अगाडि बढाउनु हुन्न, हरेक दिन तपाईँलाई पायक पर्ने ठाउँमा एक ट्रक धुलो उपहार पठाउने छु, माया सम्झेर स्विकार्नु होला।’

चिनियाँ सरकारको अनुदान सहायतामा निर्माण गर्ने भनिएको चक्रपथ दोस्रो खण्डको अन्योलताका कारण सर्वसाधारण घुवाँ धुलोको सास्ती खेप्न बाध्य छन्।

मुख्य ट्रयाक विस्तारको ठेक्का हुनुअघि सर्भिस ट्रयाक निर्माणको काम सक्ने भन्दै खन्न थालिएको स्वयम्भूदेखि बसुन्धरा खण्ड बजेट अभावले अलपत्र परेसँगै सर्वसाधारण घुवाँ धुलोको मारमा परेका हुन्।

यो खण्डको दुवैतर्फ खनिएको छ। तर काम अपुरो रहँदा धुवाँ धूलोले सडक कुहिरीमण्डल बन्ने गरेकाे छ। धूलोका कारण कष्टकर यात्रा गर्न यात्रुहरु बाध्य छन्। यसैको विरोधमा महानगर प्रमुख आक्रामक रुपमा प्रस्तुत भएका हुन्।