एसइई कप फुटसल आजदेखि

प्रथम भ्याली पब्लिक एसइई कप फुटसल प्रतियोगिता आजदेखि हुने भएको छ।

भ्याली पब्लिक स्कुलद्वारा आयोजित प्रतियोगितामा १८ बोइज टोलीको प्रतिस्पर्धा हुने भएको हो। शनिबार आयोजित पत्रकार सम्मेलनमार्फत आयोजक भ्याली पब्लिकका प्रशासन प्रमुख महेश अधिकारीले प्रतियोगिताबारे जानकारी दिएका हुन्।

तीन दिने प्रतियोगिताका खेलहरू भंगालस्थित भ्याली पब्लिकको आफ्नै फुटसल कोर्टमा खेलाइने छ। कुल १८ टोलीलाई चार समूहमा विभाजन गरी लिग कम नकआउट आधारमा खेल खेलाइने भएको छ।

समूह ‘ए’ मा टोखा एफसी, टिभ्स ‘बी’, टिम विष्ट, ब्रदर्श एफसी र डाउनटाउन तथा समूह ‘बी’ मा साइप्रस, भक्तपुर योङ्स, जुगल नव गुरुकुल, द सेभेन ब्रोस र श्रमशील एकेडेमी रहेका छन्।

रोयल कपन, ड्रागन एलिट एफसी, समृद्धि, भ्याली पब्लिक ‘बी’ र विद्याआर्जन समूह ‘सी’ मा तथा टिभ्स ‘ए’, भ्याली पब्लिक ‘ए’ र सेक्रेड हार्ट समूह ‘डी’ मा छन्। विजेताले २० हजार तथा उपविजेताले १० हजार नगद पुरस्कार प्राप्त गर्नेछन्। नगद पुरस्कारबाहेक विजेता टोलीका प्रत्येक खेलाडीले ६०, उपविजेताले ३० तथा सहभागीले १० प्रतिशत छात्रवृत्ति पाउने आयोजकले जनाएको छ।