ताप्लेजुङको आठराई त्रिवेणी गाउँपालिका ४ चाँगेमा व्यावसायिक मौरी पालन सुरु भएको छ। सो क्षेत्र मौरी पालनका लागि सम्भावनायुक्त स्थल हो। आठराई त्रिवेणी गाउँपालिकाको आर्थिक सहयोग तथा समन्वयमा त्यहाँ करिब एक सय वटा आधुनिक मौरी घार वितरण गरिएको छ।
घरेलु तथा साना उद्योग कार्यालय ताप्लेजुङको प्राविधिक सहयोगमा सुरु भएको मौरी पालनबाट व्यावसायिक रूपमा मह उत्पादन सुरु हुने संकेत देखिएको जानकारी कार्यालयका निमित्त प्रमुख युवराज घोर्साईले दिए। ‘मौरीका लागि उपयुक्त चरन क्षेत्र रहेकाले पनि मह उत्पादनमा गुणात्मक नतिजा प्राप्त हुने देखिएको छ’, घोर्साईले भने।
आठराई त्रिवेणी गाउँपालिका ४ चाँगेका वडाध्यक्ष अर्जुन लिम्बूले महको व्यावसायिक उत्पादनको सम्भावना देखेरै वडापालिकाको तर्फबाट व्यावसायिक मौरीपालनका लागि सहयोग गरिएको बताए।
उनले गुणस्तरीय र गुणात्मक दुबै प्रकृतिमा महको उत्पादन हुनेमा विश्वास लिएका छन्। महको बजार अभाव नहुने र बजारीकरणका लागि सहयोग गर्ने वचन आफूहरूले किसानलाई दिएको घोर्साईले जानकारी दिए।
मौरी एक किसिमको किरा हो। यसले विभिन्न फूलको रस संकलन गरी मह जम्मा गर्ने गर्दछ। मौरीलाई मेहनती जीवको रूपमा चिनिन्छ। यिनीहरूले पहेँलो मैन प्रयोग गरी गुँड अर्थात् (चाका) बनाउँछन् भने त्यहीँ महसमेत उत्पादन गर्छ।
Leave a Reply