मधेस सरकारको नेतृत्व परिवर्तन हुन्छ: माधव नेपाल

नेकपा एकीकृत समाजवादी (एस) का अध्यक्ष माधवकुमार नेपालले मधेस प्रदेशमा सरकारको नेतृत्व परिवर्तन हुने प्रष्ट पारेका छन्।

उनले देशको बदलिँदो राजनीति परिस्थितिअनुसार मधेस प्रदेशको सत्ता समीकरण पनि बदलिने बताएका हुन्।

मंगलबार जनकपुरधाममा समाजवादी प्रेस संगठनले आयोजना गरेको पत्रकार भेटघाट कार्यक्रममा अध्यक्ष नेपालले संघीय सरकारको स्वरूपमा भएको परिवर्तन मधेस प्रदेश सरकारमा पनि लागु हुने उल्लेख गरे।

मुलुक संघीय संरचनामा रहेकाले केन्द्रीय संरचनाअनुसार नै प्रदेश सरकारको संरचना बनाउनुपर्ने बाध्यता रहेको उनकाे भनाइ थियाे।

‘प्रधानमन्त्री पुष्पकमल दाहालले विश्वासको मत प्राप्त गरिसक्नुभएको छ, अब मधेस प्रदेशको सरकार छिट्टै परिवर्तन हुन्छ।’ अध्यक्ष नेपालले भने।

नेपाल दलित मुक्ति संगठनको कार्यक्रममा सहभागी हुन नेपाल जनकपुरधाम आएका हुन्। मधेस सरकार गठनमा नेकपा एसको सिट संख्या निर्णायक छ।

मधेस प्रदेशमा नेकपा एसको ७ प्रदेश सभा सदस्य छन्।