३० जना उत्कृष्ट शिक्षक सम्मानित

कर्णालीका प्रदेशका ३० जना उत्कृष्ट शिक्षकलाई सम्मान गरिएको छ । उत्कृष्ट शिक्षक प्रोत्साहन कार्यक्रम अन्तर्गत शिक्षा विकास निर्देशनालयद्वारा छनौट भएका ३० जना शिक्षकलाई सम्मान गरिएको हो ।

सामाजिक विकासमन्त्री माननीय घनश्याम भण्डारीका अनुसार उत्कृष्ट शिक्षक छनौट मापदण्डका आधारमा शिक्षकलाई सम्मानित गरिएको ।
‘प्रत्येक जिल्लाका माध्यमिक तह एक निम्नमाध्यमिक तह एक प्राथमिक तह एक गरी जम्मा तीन जना छनौट गर्नुपर्ने थियोे,’ उनले भने, ‘जसमा कम्तिमा एक जना महिला अनिवार्य समावेश हुने गरी छनौट गर्नुपर्ने मापदण्ड बनाएका थियौं ।’
प्रत्येक तह कक्षा ५, कक्षा ८, र एसइईको परीक्षामा उत्कृष्ट सिकाई उपलब्धी भएका र विगत ३ वर्षको शैक्षिक सत्र (०७९/८० र ८१) सिकाई उपलब्धि उच्च भएको हुनुपर्ने र एउटै स्थानीय तहबाट एक मात्र पर्ने गरी सम्बन्धित विद्यालय, पालिका र शिक्षा विकास तथा समन्वय इकाईबाट प्रमाणित सिफारिस हुनुपर्ने मापदण्ड तोकिएको शिक्षा विकास निर्देशनालयले जनाएको छ ।

५ वर्ष स्थायी सेवा अवधि भएको, राष्ट्रिय, प्रदेश र स्थानीय तहबाट शिक्षक प्रोत्साहनसँग सम्बन्धित कुनै पनि पुरस्कार तथा प्रोत्साहन प्राप्त नगरेको शिक्षकले स्व–घोषणा गरी विद्यालयको सिफारिस पत्रमा उल्लेख भएको हुनुपर्ने र शिक्षा ऐन २०२८ तथा शिक्षा नियमावली २०५९ अनुसार कुनै पनि विभागिय सजाय नपाएको शिक्षक छनौट गरेर सम्मानित गरिएको निर्देशनालयले जनाएको छ ।