कार्यदलको बैठक नसकिँदा संसद् बैठकमा ढिलाई

सहकारी ठगी प्रकरणमा संसदीय छानबिन समितिको कार्यादेश बनाउन गठित कार्यदलको बैठक नसकिँदा संसद बैठक अझै सुचारु हुन सकेको छैन।

८ बजे बोलाइएको कार्यदलको बैठक निर्धारित समयभन्दा ढिलो गरी सुरु हुँदा संसद बैठक पनि प्रभावित बनेको हो।

प्रतिनिधि सभाको बैठक बिहान ११ बजेका लािग तय गरिएको थियो। तर, आजको बैठकमा पनि सहमति हुन सकेन भने प्रमुख प्रतिपक्षी कांग्रेसले आजको बैठक पनि अवरोध गर्ने यसअघि नै चेतावनी दिइसकेको छ।

खासगरी संसदीय छानबिन समितिको कार्यविधिमा गृहमन्त्री लामिछानेको नाम उल्लेख गर्ने वा नगर्ने भन्ने विषयमा सत्ता पक्ष र प्रतिपक्षबीच विवाद देखिएको छ। प्रतिपक्षी नेपाली कांग्रेस गृहमन्त्री लामिछानेसमेत समेटिने गरी कार्यविधि बनाउनुपर्ने पक्षमा छ भने सत्ता पक्ष गृहमन्त्रीको नाम कार्यविधिमा उल्लेख गर्न तयार देखिएको छैन।

छानबिन कार्यविधिमा लामिछानेको नाम राखिए उनले गृहमन्त्रीबाट राजीनामा दिनुपर्ने अवस्था आउन सक्छ। उनले राजीनामा दिए सरकार अप्ठेरोमा पर्ने सम्भावना छ। त्यसैले सत्ता पक्ष कांग्रेसको मागमा सहमत हुन नसकेको हो।