रुसमा ७ दशमलव ८ म्याग्निच्युडको शक्तिशाली भूकम्प, सुनामीको चेतावनी

भूकम्पपछि सुनामीको चेतावनी दिइएको छ । समुद्री तटमा ३० देखि ६२ सेन्टिमिटर उचाईको लहर पनि देखिएका छन् । कामचत्काका गभर्नर भ्लादिमिर सोलोदोभले सबै आपतकालीन सेवा हाई अलर्टमा राखिएको र अहिलेसम्म कुनै क्षतिको विवरण नआएको बताएका छन् । आज मात्रै उक्त क्षेत्रमा चार ठूला ७ म्याग्निच्युड वा त्यसभन्दा धेरैको भूकम्प आएको रेकर्ड गरिएको छ ।सामाजिक सञ्जालहरुमा साझा गरिएका भिडियोहरुमा भूकम्पका कारण घरमा फर्निचर, बिजुलीका बल्बहरु हल्लिरहेको देखिन्छन् । भूकम्पको शक्तिशाली झड्काका कारण सडकमा गुडिरहेका कारहरु पनि हल्लिरहेको देखिन्छन् ।

अमेरिकाको भूवैज्ञानिक सर्भेक्षणका अनुसार भूकम्पको केन्द्रविन्दु रुसी शहर पेट्रोपावलोभ्स्क–कामचत्स्कीभन्दा १२८ किलोमिटर टाढा रहेको छ । जमिनभन्दा १० किलोमिटर मुनिबाट भूकम्प आएको थियो । रुसको स्टेट जियोफिजिकल सर्भिसले भूकम्पको तीव्रता सुरुमा ७ दशमलव ८ भनिएपनि पछि ७ दशलव ४ म्याग्निच्युड रेकर्ड गरिएको बताएको छ ।