जेनजी आन्दोलन भएयता सम्पर्कमा छैनन् हुम्लाका थुक्तेन

हुम्लाको नाम्खा गाउँपालिका–३ खगाल गाउँका थुक्तेन पाल्वर तामाङ परिवारको सम्पर्कमा नआएको आइतबार १२ दिन पुगेको छ । गएको भदौ २३ र २४ गते भएको जेन–जी समूहको आन्दोलनपश्चात उनी परिवारको सम्पर्कमा छैनन् । थुक्तेन २४ गतेसम्म साथीभाईको सम्पर्कमा भएको खबर परिवारले पाएका थिए । त्यसयता भने न उनी परिवारको सम्पर्कमा छन्, न त साथीभाईको ।
उनी वेपत्ता भएपछि बुवाआमाले नाम्खा गाउँपालिकामा सम्पर्क गरेका थिए । गाउँपालिकाले खोजीका लागि गृहमन्त्रालयलाई पत्राचार गरेको छ । यद्यपि थुक्तेनको बारेमा एथेष्ट जानकारी गाउँपालिकालाई प्राप्त भएको छैन । ‘आजका मितिसम्म वेपत्ता नै हुनुहुन्छ, गृहलाई खोजी गरिदिन भनेका छौं तर आधिकारिक अझैं आइपुगेको छैन ।’ नाम्खा गाउँपालिकाका अध्यक्ष प्रेमबहादुर लामाले भने ।
भदौ २३ गते जेनजी प्रदर्शनमा सहभागी भएर थुक्तेन कोठा फिर्ता भएको उनका बुबा टसी छिरिङको भनाई उद्धृत गर्दै पालिका अध्यक्ष लामाले बताए । २४ बर्षीय उनी काठमाडौंकै एक होटेलमा काम गर्दै आएका थिए । भदौ २४ गते पनि होटलमा बिहानको सिफ्ट काम गरिसकेर थुक्तेन दिउँसो २ बजे कोठमा आएका थिए । कोठामा आएलगत्तै उनी जेनजी समूहको प्रदर्शनमा सहभागी हुन गएको खबर उनका साथीहरुले परिवारलाई जानकारी गराएका छन् ।
पछिल्लो दिन (२४ गते) को जेनजी प्रदर्शनमा गएको दिनदेखि भने थुक्तेन कोठामा फिर्ता नभएको बुबा टसी छिरिङको भनाई उद्धृत गर्दै गाउँपालिकाका अध्यक्ष लामाले जानकारी दिए । त्यसयता हालसम्म पनि काठमाडौँका विभिन्न ठाउँहरुमा खोजी कार्य गर्दा कतै नभेटिएको उनले जानकारी दिए ।
उनी बौद्धमा भएको आन्दोलनमा सहभागी हुन कोठाबाट निस्केका हुन् । त्यसयता वेपत्ता भएको थुक्तेनका बुवा टसीले पालिकामा जानकारी गराएका हुन् । जेनजी प्रदर्शनमा निस्केर बेपत्ता भएको छोराको खोजी गरिदिन टसीले पालिका अध्यक्ष लामासहितका जनप्रतिनिधिलाई आग्रह गरेका थिए । वेपक्ता भएका थुक्तेन टसीका दुई जना छोरामध्ये कान्छा हुन् ।
बुवा टसी तामाङले दिएको जानकारीका आधारमा गृह मन्त्रालयलाई खोजी कार्य गरी आधिकारिक जानकारी पठाउन भनेर पालिकाबाट पत्राचार गरिएको अध्यक्ष लामाले बताए । ‘यता त परिवार विछिप्त अस्थामा हुनुहुन्छ, गाउँमा पनि शोकको अवस्था छ, वेपत्ता युवकाको अवस्थाका बारेमा त जिम्मेवार गृह प्रशासनले जानकारी दिनुप¥यो नि १’ नाम्खा गाउँपालिकाका अध्यक्ष लामाले भने, ‘जिम्मेवार निकायको आधिकारिकता नआएसम्म उहाँको परिवार त आश गरेरै बस्छ, त्यसैले प्रशासनले उनको छिटो खोजी गरिदिनुपर्छ ।’ हुम्लाको युवा जेनजी प्रदर्शनमा गएर बेपत्ता भएपछि नाम्ख्योम हुम्ला बौद्ध समाजका अध्यक्ष अंगबहादुर लामाले पनि सूचना निकालेर खोजीका लागि गृहप्रशासनलाई आग्रह गरेका छन् । समाजका तर्फबाट गत बुधबार ऊर्जा, जलस्रोत तथा सिँचाइमन्त्री कुलमान घिसिङलाई ज्ञापनपत्र बुझाएर पनि खोजी गरिदिन आग्रह गरिएको थियो ।
२४ वर्षका थुक्तेन नारायनथान गुम्बाबाट लामा ज्ञान अध्ययन पूरा गरेर हाल तीनचुलीस्थित कोठा लिएर आफ्ना भतिजासँग बस्दै आएका थिए । काठमाडौं बस्दाको खर्च धान्न उनले होटलमा जागिर गरिरहेको उनका बुवा टसीको भनाई उद्धृत गर्दै पालिका अध्यक्ष लामाले बताए ।