स्पष्ट योजनासहित काम गर्न सहिचवहरुलाई मुख्यमन्त्रीको निर्देशन

कर्णाली प्रदेशका मुख्यमन्त्री यामलाल कँडेलले स्पष्ट योजनासहित काम गर्न सचिवहरुलाई निर्देशन दिएका छन् । शनिबार प्रमुख सचिव र अन्य मन्त्रालयका सचिवहरुसँग भेटघाट गरी उनले जेनजी आन्दोलनले उठाएका सकारात्मक माग र भावनालाई सम्मान गर्दै सुधारको स्पष्ट योजनासहित काम गर्न निर्देशन दिएका हुन् ।
मुख्यमन्त्री कँडेलले सुधारलाई व्यवहारमा रूपान्तरण गर्न आग्रह गरे । अहिले जनताले सेवामा पारदर्शिता, जवाफदेहिता र सहजता अपेक्षा गरेकोले सरकारले दिने प्रत्येक सेवामा जनतालाई प्रत्यक्ष सुधारको अनुभूति दिलाउनुपर्नेमा उनले बताए । ‘कार्यालयका ढोका जनताका लागि खुला हुनुपर्छ, कागजपत्रमा मात्र होइन, व्यवहारमा पनि पारदर्शिता देखिनुपर्छ,’ उनले भने, ‘हामीले हिजोका कमजोरी सुधारका उपाय पनि खोज्नु जरुरी छ ।’
विगतका कमजोरीबाट पाठ सिक्दै नयाँ सोच र कार्यशैली अपनाएर काममा गति दिन मुख्यमन्त्री कँडेलले निर्देशन दिएका छन् । सरकारको प्राथमिकता खर्च कटौती, कार्यक्षमता वृद्धि र परिणाममुखी सेवा प्रवाहमा केन्द्रित हुनुपर्ने उनले बताए । वर्तमान संघीय सरकारसँग प्रतिस्पर्धा गर्न सक्ने किसिमको खर्च कटौती गर्न, तालिम, भ्रमण, गोष्ठी र आवश्यक नभएका योजनाबाट खर्च कटाउने प्रस्ताव, फजुल खर्च रोक्ने नीति र योजना ल्याउन पहल गर्न उनले सचिवहरुलाई निर्देशन दिएका छन् ।
प्रत्येक मन्त्रालय र कार्यालयमा देखिने अनावश्यक खर्च, ढिलासुस्ती र प्रक्रियागत जटिलता अन्त्य गर्न पनि मुख्यमन्त्री कँडेलले निर्देशन दिए । उनले सेवाप्रवाहमा सरलता ल्याउन, ढिलाई हुने प्रवृत्तिलाई अन्त्य गर्न र जनतामुखी प्रशासनिक सुधारमा जोड दिनुपर्ने बताए ।