आसामेली साहित्यकार ज्ञानबहादुर क्षेत्रीलाई अक्षरमार्ग सम्मान

साहित्यिक पत्रकारितामा प्रख्याति कमाएको काभ्रे पनौतीको अक्षरमार्ग साहित्यिक त्रैमासिक पत्रिकाले काव्यगोष्ठीमा भारत आसामबाट आएका वरिष्ठ साहित्यकार ज्ञानबहादुर क्षेत्रीलाई सम्मान गरेकाे छ।

सम्मानित क्षेत्रीले आसाममा नेपाली भाषी साहित्यको चर्चा गर्दै सम्मानप्रति आभार व्यक्त गरेका थिए।

काभ्रेको पनौतीस्थित इन्द्रेश्वर क्याम्पसमा कार्यक्रम भएकाे हाे। साहित्यिक पत्रकारिताका साथै विभिन्न साहित्यिक क्रियाकलाप र स्रष्टाहरूलाई सम्मान तथा पुरस्कार दिंदै आएको अक्षरमार्गको संयोजनमा भएको सो काव्यगोष्ठीमा देशका विभिन्न ठाउँबाट आएका स्रष्टाहरूले सिर्जना वाचन गरेका थिए। उनीहरूले सिर्जनामार्फत समाजको चित्रणका साथै विद्यमान विकृति र विसङ्गतिप्रति व्यङ्ग्य गर्दै समृद्ध र सुन्दर भविष्यको कामना समेत गरेका थिए।

कार्यक्रममा प्राडा गोविन्दराज भट्टराईले अक्षर कर्ममा लागिरहेका अक्षरमार्गका सम्पादक सूर्यप्रसाद लाकोजूको परिश्रमले साहित्यिक जगत फराकिलो बन्दै गएको बताए। उनले स्रष्टाहरूलाई साहित्य कर्ममा उत्साहित गर्न काभ्रेको पनौतीले योगदान पुर्‍याइरहेको जनाए।

काव्य गाेष्ठीमा स्रष्टा लाकोजूका ‘पनौतीका केही जात्रापर्वहरू’ को परिचर्चा पनि भएको थियाे। साहित्यकार तुयकाजी ताम्राकारले पुस्तककाे चर्चा गर्दै पुस्तकले पनौतीको महत्त्व र ऐतिहासिकता, पनौतीका मूर्त, अमूर्त सम्पदा जस्ताे महत्त्वपूर्ण जानकारी पस्केको चर्चा गरे।

सोही अवसरमा स्रष्टाहरू हरिप्रसाद चौंलागाईं, मणिराज सिंह, मच्छेश्वर सापकोटा, सरस्वती सापकोटा, कृष्णकुमार वैद्य, विश्व सिग्देल, विनोद विक्रम, रामसुन्दर देउजा, सुशिला विष्ट, ध्रुवकृष्ण ताम्राकार, डा सिर्जना शर्मा (गुहाटी), पूर्ण श्रेष्ठ, सोमकाजी शाक्य, भवानी खतिवडा, काशीराम विरस, जानुका खतिवडा, बुद्धिमान महर्जन, उपासना बराल, जुमन किरण, अनिता कोइराला, दशरथ भट्टराई, निरा श्रेष्ठ, भगवती बस्नेत, अजय घिसिङ, सुरेश सैंजू, भवानी पाण्डे, विजयराम कर्माचार्य बिकुनारायण ताम्राकार, दिव्य गिरी, प्रकाश कायस्थ, ललिता अधिकारी र लक्ष्मण गाम्नामे लगायतले सिर्जना वाचेका थिए।

गोष्ठीमा वाचक स्रष्टाहरूलाई अक्षरमार्गका सम्पादक, साहित्यकार प्राडा गोविन्दराज भट्टराई, ज्ञानबहादर क्षेत्री लगायतले सम्मानपत्र प्रदान गरेका थिए।

पनौती नगरपालिकाका नगर प्रमुख रामशरण भण्डारीको पनि उपस्थिति रहेको सो कार्यक्रममा उनले पनौतीको सौन्दर्य र संस्कृतिलाई प्रवर्द्धन गर्ने काम अक्षरमार्गले गरेको उल्लेख गरे। उनले पनौतीलाई सांस्कृतिक नगरका रूपमा परिचित गराउने क्रममा समेत रहेको बताए।

सञ्चारकर्मी हरिसुन्दर छुकाले सञ्चालन गरेको सो कार्यक्रममा अक्षरमार्गका सम्पादक लाकोजूले गोष्ठीमा नेपालका मात्र नभएर छिमेकी मुलुक भारतबाट समेत सर्जकको सहभागिताले उर्जा प्राप्त भएको चर्चा गरे। कार्यक्रममा इन्द्रेश्वर क्याम्पसका प्रमुख श्रीकुमार सुवालले क्याम्पसले शिक्षा र साहित्यलाई सँगसँगै अगाडि बढाइरहेको बताए।