विपद प्रतिकार्यमा स्रोत अभाव छ : मन्त्री भण्डारी

कर्णाली प्रदेशका सामाजिक विकास मन्त्री घनश्याम भण्डारीले विपद जोखिम न्युनिकरणका लागि स्रोतको अभाव रहेको बताएका छन् । बिहिबारदेखि सुरु भएको प्रदेश स्वास्थ्य आपतकालीन तयारी तथा प्रतिकार्य योजनासम्बन्धी कार्यशालाको उद्घाटन सत्रमा बोल्दै मन्त्री भण्डारीले प्रदेशस्तरमा विपद जोखिम न्युनिकरण र प्रतिकार्यका लागि स्रोत जुटाउन आवश्यक भएको बताएका छन् ।
‘हाम्रो प्रदेशमा विपदको जोखिम धेरै छ, न्युनिकरणका लागि धेरै काम पनि गर्नुपर्नेछ,’ उनले भने, ‘कर्णालीको भूगोल अनुकूल विपद्को प्रतिकार्य गर्न तत्काल खर्च गर्ने स्रोत जुटाउन कठिन हुने गरेको छ, स्रोत संकलन गर्न हामी सबैको सहकार्य जरुरी छ ।’
मन्त्री भण्डारलीले राष्ट्रिय तथा अन्तराष्ट्रिय स्तरमा तालिम प्राप्त जनशक्तिहरु संख्यामा धेरै भएपनि विपद प्रतिकार्यका लागि कार्य क्षेत्रमा खटिने संख्या कम भएको बताए । यद्यपि आगामी दिनमा सक्रिय रुपमा खटाउन क्रियाशिल व्यक्तिहरुको छनोट गर्न प्रदेश सरकारले काम गर्ने उनले बताए ।
उनले कार्यान्वयन हुने योजनाहरुको निर्माण र त्यसको रुपरेखा तयार गर्न यस्ता किसिमका गोष्ठीले सहयोग पुग्ने बताए । विपदमा स्थानीय जनशक्ति र स्रोतको उपयोग हुनेगरी त्यस किसिमको कार्ययोजना निर्माण गर्न पनि आग्रह गरे । ढाँचाअनुसार तयार भएका योजनालाई सरकारले अपनत्व लिँदै सक्रिय बनाइने उनले प्रदेश सरकारका तर्फबाट प्रतिवद्धता जनाएका छन् ।