‘सरकारको ध्यान हाम्रो क्षेत्रमा पनि पुगोस्’

पछिल्लो मौसममा आएको बदलीसँगै बुधबारदेखि नै उच्च हिमाली क्षेत्रमा वर्षा र हिमपात भइरहेको छ । बाह्य पर्यटकका लागि हिमपातले मनोरञ्जन थपेपछि डोल्पाका स्थानीया लागि भने यो कष्टकर समय हो । स्थानीयको नियमित दैनिकी मात्र होईन, हिमपातले माथिल्लो डोल्पामा आवतजावत समेत ठप्प पारेको छ ।
हिमपातकै कारण स्थानीय तहले आफ्नो सेवा प्रवाह गर्न पनि कठिनाई भएको छ । शे–फोक्सुन्डो गाउँपालिकाका उपाध्यक्ष पेम्मा वाङछेन गुरुङले डोल्पा जस्ता कर्णालीका हिमाली क्षेत्रमा परेको कठिानईतर्फ पनि सरकारको ध्यान जानुपर्ने बताए । ‘पानी पर्ने, चिसो हुने, हिउँ परेर बरफ जम्ने हिमाली क्षेत्रको विशेषता हो, यहाँ तीन÷चार दिनदेखि निरन्तर पानी र हिउँ परेको छ,’ उपाध्यक्ष पेम्बा भन्छन्, भरपर्दो इन्टरनेट नहुँदा पालिकाको सानोतिनो काम गर्न पनि कठिनाई छ, सरकारले हिमाली क्षेत्रका यस्ता समस्या समाधानका लागि ध्यान दिनुपर्छ ।’
उनले पालिकामा फाइबरसहितको इन्टरनेट नहुँदा वायरलेस इन्टरनेटले हिमपात र बर्षाको समयमा दुख दिने गरेको बताए । एक त कमजोर, त्यहीमाथि बेलाबेला अवरुद्ध हुने इन्टरनेटका कारण पालिकाको भुक्तानी सेवा समेत रोकिएको उपाध्यक्ष पेम्माले दुखेसो पोखे । शेफोक्सुण्डो गाउँपालिकाको हिउँदे सभा समेत गर्न नसकिएको अवस्थामा हिमपात र बर्षाले इन्टरनेटमा पु¥याएको अवरोधले झन कठिनाई भएको उनी बताउँछन् ।
नयाँ बनेको सरकारले अब सहरकेन्द्रित विकासभन्दा विकटका कठिन समस्या समाधानमा ध्यान दिनुपर्ने उनले बताए । विकासका काम सहरकेन्द्रित भईरहेकोले अति विकट क्षेत्रमा आधारभूत आवश्यकता पनि पूर्ति गर्न समस्या भईरहेको उनी बताउँछन् । ‘अहिले त नयाँ मन्त्रिपरिषद विस्तार भएको छ, विकास सहरकेन्द्रित भन्दा पनि विकट र दुर्गम गाउँतिर नयाँ सरकारले ध्यान दिनुपर्छ ।’ पेम्माले भने ।
उपल्लो डोल्पाका सबै भाग राष्ट्रिय सडक सञ्जाल, विद्युत, इन्टरनेटको प्रसारण लाईनको पहुँचमा छैनन् । पालिकाको काम सोलारको भरमा गर्नुपरेकाले हिमपातका बेला त्यसमा पनि समस्या उत्पन्न हुने गरेको उपाध्यक्ष पेम्माले बताए । उपल्लो डोल्पाबाट सदरमुकाम पुग्न तीन दिन लाग्छ । शे फोक्सुन्डो गाउँपालिकामा १ हजार ४ सय घरधुरी छन् ।