‘भेरी–बबईलाई समस्याग्रस्त हुन दिनु हुँदैन’

कर्णाली प्रदेशका मुख्यमन्त्री यामलाल कडेलले भेरी–बबई डाइभर्सन बहुउद्देश्यीय आयोजनालाई ‘समस्याग्रस्त आयोजना’ बन्न दिन नहुने बताएका छन् । यसलाई रुग्ण हुन नदिन संघीय सरकारले विशेष कदम चाल्नुपर्ने बताए । शनिबार आयोजनाको स्थलगत अनुमगमन गर्दै मुख्यमन्त्री कँडेलले आयोजनाको यही अवस्था रहे कामको गति नबढने र थप भएको समयमा समेत आयोजना सम्पन्न नहुने अवस्थाले आयोजनाको भविष्यमाथि चिन्ता सिर्जना भएको बताए ।
आयोजनाका पदाधिकारीसँग छलफल गर्दै उनले संघीय सरकारको कार्यक्षेत्र रहेपनि प्रदेशको चासो र चिन्ता हुने भएकाले राष्ट्रिय गौरवको यो आयोजना निर्माणको गतिलाई तिव्र पार्नुपर्ने बताए । ‘आयोजनाको काम सुस्त भईरहेको छ, थपिएको समयमा पनि ६० प्रतिशतको आसपासमा मात्र काम भएको रहेछ’ उनले भने, ‘यहि गतिले अर्को चार वर्षमा पनि सम्पन्न हुने छाँट देखिदैन ।’ छलफलको क्रममा मुख्यमन्त्री कँडेलले आयोजनाको अहिलेको कार्य प्रगति हेरेर समस्याग्रस्त आयोजनाको रूपमा राख्ने तयारी भन्दा कामको गति बढाउनेगरि संघीय सरकारले विशेष योजना निर्माण गर्नुपर्ने औंल्याए ।
छलफलमा आयोजना प्रमुख सुरेन्द्र पौडेलले आयोजनाको कार्य प्रगति अपेक्षा भन्दा कमजोर रहेकोले थपिएको समयमा काम सम्पन्न हुन नसक्ने बताए । उनले आयोजनाका सन्दर्भमा आफूहरुको अधिकार सिमित रहेकोले माथिललो निकायको विशेष पहल आवश्यक रहेको बताए । उनका अनुसार आर्थिक बर्ष २०७१÷०७२ आर्थिक वर्षमा सुरु गरिएको भेरी–बबई डाइभर्सन आयोजनाको समग्र प्रगति हालसम्म करिब ५७ प्रतिशत पुगेको छ । आयोजनाको पछिल्लो म्याद २०८२ चैतमा सकिँदैछ ।
प्रमुख पौडेलका अनुसार आयोजनामा अझै १० जना उच्च तहका प्राविधिक पद रिक्त छन् । यसले कामको गति प्रभावित पारेको उनले बताए । यो आयोजनाले भेरी नदीको पानी १२.२ किलोमिटर लामो सुरुङमार्फत बबई नदीमा खसालेर बाँके बर्दियाका ५१ हेक्टर क्षेत्रमा सिँचाई पु¥याउने उद्देश्य रहेको छ । सुरुङबाट खसेको पानीले बबईतर्फका हात्तिखालमा ४६.६ मेगावाट विद्युत उत्पादन गर्ने पनि लक्ष्य छ । पहिलो चरणमा सुरुङ निर्माणको जिम्मा पाएको चिनियाँ कम्पनीले तोकिएको समयभन्दा एक वर्षअघि नै २०७६ वैशाखमा काम सकेको थियो ।