प्रधानमन्त्री बन्ने लोभमा जेल तोडे, जहाँ–जहाँ रविका मुद्दा थिए, सबै अदालत जलाए– महेश बस्नेत

नेकपा एमालेका पोलिटब्युरो सदस्य महेश बस्नेतले प्रधानमन्त्री बन्ने लोभमा जेल तोडेर रास्वपा सभापति रवि लामिछानेलाई बाहिर निकालेको आरोप लगाएका छन् ।
जहाँ–जहाँ रविका मुद्दा थिए सबै अदालत जलाइएको उनले आरोप लगाए । आइतबार भक्तपुरमा युथ फोर्सको घोषणा कार्यक्रममा बस्नेतले प्रधानमन्त्री बन्ने लोभमा जेल फोरेर रास्वपाले १४ हजार कैदी भगाएको आरोप लगाएका हुन् ।
‘रविलाई प्रधानमन्त्री बनाउने लोभमा रास्वपाका हरि ढकाल, ज्वाला संग्रौला लगायत चटपटे नेताले जल फोर्ने अभियान चलाए । जेल फोरेपछि लुटिएका प्रहरीका १२ सय हतियार फिर्ता भएका छैनन् । प्रहरी निरीह छ,’ बस्नेतले भने, ‘जहाँ–जहाँ रविका मुद्दा थिए, सबै अदालत जले ।’ एमाले नेता बस्नेतले देशमा कांग्रेस र एमाले आवश्यक भए पनि प्रचण्ड र रवि लामिछानेको पार्टी नभए पनि फरक नपर्ने टिप्पणी गरे ।