पसलमा आगो लगाएको आरोपमा एक जना पक्राउ

जिल्ला प्रहरी कार्यालय सुर्खेतले पसलमा आगो लगाएको आरोपमा एक जनालाई वीरेन्द्रनगरबाट एक जनालाई पक्राउ गरेको छ । पक्राउ पर्नेमा वीरेन्द्रनगर–८ का दीपक कँडेल रहेको जिल्ला प्रहरी कार्यालय सुर्खेतका प्रवक्ता डिएसपी मोहनजंग बुढथापाले जानकारी दिए ।
कात्तिक ३० गते वीरेन्द्रनगर ६ सनिहलस्थित सुपरमार्केटको १ नम्बर सर्टरमा सञ्चालित नवदुर्गा बेवी सप र २ नम्बर सर्टरमा रहेको अचार पसलमा आगलागी भएको थियो । बिहान ४ बजेतिर लागेको आगो प्रहरीले दमकलको सहायताले नियन्त्रणमा लिएको थियो ।
आगलागीबाट जुना कुमारी बोहराले सञ्चालन गरेको बेवी सप र खगीसरा बुढाले सञ्चालन गरेको अचार पसलका सामग्री पूर्णरुपमा जलेर नष्ट भएका छन् । आगलागीपश्चात पीडितले प्रहरीमा छानविन गरिदिन निवेदन दिएका थिए । निवेदनका आधारमा खोजी गर्नेक्रममा मंगलबार कँडेललाई पक्राउ गरिएको डिएसपी बुढथापाले जानकारी दिए । घटनाको विषयमा थप अनुसन्धान भईरहेको उनले बताए ।