बिहान कालो झण्डा, दिउँसो सम्पत्ति हस्तान्तरण

आइतबार जनार्दन शर्मा गृहजिल्ला रुकुम पश्चिम पुगेका थिए । काठमाडौंबाट जहाजमार्फत उनी रुकुम पश्चिमको सल्ले विमानस्थलमा अवतरण गरेका हुन् । आफ्नो पूर्व पार्टी नेकपा माओवादीले वाम घटकहरुबीच एकता गरेपछि चित्त नबुझाएर प्रचण्डसँग छुट्टिएपछि उनी पहिलोपटक गृहजिल्ला आएका हुन् । गएको कात्तिक १९ गते नेकपा माओवादी केन्द्र, नेकपा एकीकृत समाजवादी लगायतका १० वटा भन्दा बढी वाम घटकहरुबीच एकता भएर ‘नेपाली कम्युनिष्ट पार्टी’ बनेको छ । यसको संयोजक पूर्व नेकपा मओवादी अध्यक्ष प्रचण्ड बनेका छन् । प्रचण्डाको एकता गर्ने यही निर्णयमा चित्त नबुझेपछि जनार्दन आफू अलग भएर प्रगतिशील लोकतान्त्रिक अभियान घोषणा गरेका थिए । यसलाई उनले केही समयअघि निर्वाचन आयोगमा ‘प्रगतिशील लोकतान्त्रिक पार्टी’ का रुपमा दर्ता गराएका छन् ।
नयाँ पार्टी खोलेपछि सांगठनिक कामको उद्देश्यसहित आएका जनार्दनका लागि गृहजिल्ला प्रवेश नै रोचक बनेको छ । उनलाई प्रवेश गर्नेवित्तिकै सुरुमा कालो झण्डा देखाईएको छ भने केही समयपछि दिउँसो पार्टी कार्यालयका लागि भौतिक सम्पत्ति हस्तान्तरण गरिएको छ । उनलाई कालो झण्डा देखाउने र सम्पत्ति हस्तान्तरण गर्ने दुवै पूर्व माओवादी केन्द्र थिए । तत्कालिन माओवादी केन्द्र आठविसकोट नगरपालिका कमिटीका पूर्वअध्यक्ष मानबहादुर चँदारा नेतृत्वको टोलीले उनलाई कालो झण्डा देखाएको हो । तत्कालिन माओवादी केन्द्रका पूर्व जिल्ला अध्यक्ष गोविन्द रोका (हाल नेपाली कम्युनिष्ट पार्टीका जिल्ला संयोजक) ले सम्पत्ति बाँडफाँटको सहमतिपत्रमा हस्ताक्षर गरेका हुन् ।
रोकाले कालो झण्डा देखाएको विषयलाई भने सामान्य भएको बताएका छन् । उनले सहिद परिवारले जनार्दन शर्मालाई कालो झण्डा देखाएको बताए । ‘यो विषयलाई स्वभाविकै मान्नुपर्छ, किन भने उहाँहरुको पनि शर्मासँग केही अपेक्षा थिए होलान्,’ रोकाले भने, ‘उहाँहरुको आशाको केन्द्रविन्दूले अर्को बाटो रोजेपछि यति कुरालाई असामान्य मान्न सकिँदैन ।’ शर्माको गृहजिल्ला प्रवेशका क्रममा सुरक्षाकर्मी भने बाक्लो संख्यामा तैनाथ गरिएको थियो ।
कालो झण्डाले विरोध गरेको केही समयपछि नै उनको नयाँ पार्टी प्रगतिशील लोकतान्त्रिक पार्टी र नेपाली कम्युनिष्ट पार्टीबीच कार्यालय प्रयोजनका लागि भौतिक सम्पत्ति बाँडफाँटको सहमति पत्रमा हस्ताक्षर भएको थियो । प्रगतिशील लोकतान्त्रिक पार्टीको तर्फबाट रुकुम पशिचम जिल्ला संयोजक रहेका गोर्खबहादुर केसीले सहमतिपत्रमा हस्ताक्षर गरेका छन् ।
सहमतिपत्रमा तत्कालीन माओवादी केन्द्रले प्रयोग गर्दै आएका भौतिक संरचनाहरु औपचारिक रुपमा भागबण्डा गरिएको उल्लेख छ । ‘नेपाली कम्युनिष्ट पार्टी’ (नेकपा) र ‘प्रगतिशील लोकतान्त्रिक पार्टी’ (प्रलोपा) बीच सदरमुकामस्थित महत्वपूर्ण भवन तथा संरचनाहरु प्रयोग गर्ने सम्बन्धमा लिखित सहमतिसहित भागबण्डा भएको हो । शर्मा प्रगतिशील लोकतान्त्रिक पार्टीको संरक्षक छन् ।
विगतमा एउटै पार्टीमा रहेर काम गरेको र भविष्यमा पनि सहकार्य गर्न सकिने उल्लेख गर्दै दुवै पक्षले सहमति पत्रमार्फत सम्पत्ति बाँडफाँड गरेको सार्वजनिक गरिएको छ । सहमति अनुसार मुसिकोट नगरपालिकाका दुई फरक स्थानमा रहेका भवनहरु (जसलाई यसअघि नेकपा माओवादी) ले प्रयोग गरेको थियो ।
मुसिकोट नगरपालिका वडा नम्बर ५ सेरीगाउँमा रहेको ‘शहीद स्मृति प्रतिष्ठान’ र ‘ईस्कन्द नर्मदा फाउण्डेशनको परिसरमा रहेका भौतिक संरचना नेपाली कम्युनिष्ट पार्टीले प्रयोग गर्ने सहमति भएको छ । यस्तै मुसीकोट नगरपालिका वडा नम्बर १ स्थित खलंगा बजारमा रहेको ‘ईस्कन्द नर्मदा स्मृति फाउण्डेशन’को नाममा भएको भवनलाई भने जनार्दन नेतृत्वको प्रगतिशील लोकतान्त्रिक पार्टीले प्रयोग गर्ने सहमति भएको छ । उक्त भवन फाउण्डेशन आफैंले बनाएर तत्कालिन नेकपा माओवादी केन्द्रलाई प्रयोग गर्न दिईएको थियो । ईस्कन्द नर्मदा फाउण्डेशन पनि जनार्दन शर्मा आफैंले खोलेका हुन् । उनका बुवा ईस्कन्द शर्मा र आमा नर्मदा शर्माको नाममा यो फाउण्डेशन स्थापना भएको थियो ।
यो सहमति मंसिर १५ गते नै भएको भएपनि आइतबार औपचारिक रुपमा हस्ताक्षर गरिएको हो । यो सम्झौता आइतबार (मंसिर २१ गते) बाटै लागु हुने भएको छ ।