दलको नेता छलफलबाटै टुंग्याउन निर्देशन

नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ले कर्णाली प्रदेश संसदीय दलको नेता चयन प्रक्रियाबारे चासो व्यक्त गरेका छन् । शनिबार आयोजित ‘एकता सभा’लाई सम्बोधन गर्न सुर्खेत आएका प्रचण्डसहित सहसंयोजक माधवकुमार नेपाल र नेता कालिबहादुर मल्लको उपस्थितिमा नेकपा कर्णाली प्रदेश सभा संसदीय दलको बैठक बसेको थियो ।
उक्त बैठकमा संयोजक प्रचण्डले दलको नेता चयन र आगामी रणनीतिका विषयमा विशेष चासो राखेका हुन् । कर्णालीमा नेकपा (माओवादी केन्द्र) र नेकपा (एकीकृत समाजवादी) बिच एकता भई ‘नेकपा’ मा रुपान्तरण भए पनि हालसम्म संसदीय दलका पदाधिकारी चयन हुन सकेका छैनन् । ‘पदाधिकारी चयनको विषय दलभित्रकै छलफल र सहमतिका आधारमा टुङ्ग्याउनुपर्छ,’ प्रचण्डको भनाइ उद्धृत गर्दै सांसद कृष्णबहादुर जिसीले भने, ‘अब प्रतिपक्षमा रहँदा सोही अनुसारको भूमिकालाई प्रभावकारी बनाउन लाग्नुस् ।’
प्रचण्डले सकेसम्म संसदीय दलको नेता र पदाधिकारीको चयन संसदीय दलकै छलफलबाट टुङ्गोमा पुर्याउन निर्देशन दिएका छन् । यदि सहमति नजुटेको खण्डमा प्रदेश पार्टी कमिटीले जिम्मेवारी लिएर निर्णय गर्ने उनको भनाइ छ । दलले तल्लो तहबाट जे निष्कर्ष निकाल्छ, त्यसैका आधारमा केन्द्रले धारणा बनाउने र माथिबाट छुट्टै लाद्ने वा अलग धारणा नबनाईने बताएको जिसीले जनकारी दिए ।
बैठकमा सहभागी सहसंयोजक माधवकुमार नेपालले भने यसबारे कुनै औपचारिक धारणा राखेनन् । उनीसँग सांसदहरुको परिचयात्मक कार्यक्रममात्र भएको जिसीले जानकारी दिए । जिसीका अनुसार, पदाधिकारी चयनको विषयमा अब छिटै छलफल अघि बढाइने छ । दुई दलको एकतासँगै कर्णाली प्रदेश सभामा नेकपा दोस्रो शक्ति मै सीमित छ । यहाँ समाजवादीका जम्मा १ सांसद छन् भने माओवादीका १३ जना छन् । संसदीय दलको नेताका लागि सांसदहरु विन्दमान विष्ट, कृष्णबहादुर जिसी, मंगल शाही, महेन्द्र केसी र दुर्ग रावतलगायतले दाबी प्रस्तुत गरेका छन् ।