निर्देशनविपरीत जीवन शाहीलाई उम्मेदवार सिफारिस

नेपाली कांग्रेस हुम्लाले पार्टी केन्द्रको परिपत्र र निर्देशनविपरीत कर्णाली प्रदेशका पूर्वमुख्यमन्त्री एवं वर्तमान प्रदेश सभा सदस्य जीवनबहादुर शाहीलाई प्रतिनिधिसभा सदस्यको उम्मेदवारका लागि सिफारिस गरेको छ । शाही अहिले प्रदेश सभा संसदीय दलका नेतासमेत हुन् ।
कांग्रेस केन्द्रीय समितिले हाल पदमा रहेका सांसदहरुलाई उम्मेदवार सिफारिस नगर्न परिपत्र जारी गरे पनि हुम्ला जिल्ला कार्य समितिले त्यसलाई लत्याउँदै शाहीको नाम सर्वसम्मत सिफारिस गरेको हो । आगामी निर्वाचनका लागि प्रतिनिधिसभा प्रत्यक्षतर्फ शाहीसहित तीन जनाको नाम सिफारिस गरिएको छ । सिफारिस हुनेहरुमा जयपति रोकाया र रिताकुमारी शाही पनि छन् । सिफारिस गरिएकामध्ये जीवनबहादुर शाही र जयपति रोकाया संस्थापन (देउवा) पक्षका हुन् भने रिताकुमारी शाही संस्थापन इतर (शेखर) पक्षकी नेतृ हुन् ।
पार्टीको केन्द्रीय परिपत्रमा बहालवाला सांसदलाई पुनः उम्मेदवारको रुपमा सिफारिस नगर्न स्पष्ट निर्देशन छ । तर उम्मेदवारको सूचीमा रहेकी रिताकुमारी शाहीले जीवनबहादुर शाही जिल्लाको ठुलो नेता भएको र स्थानीय कार्यकर्ताको भावनाको कदर गर्नुपर्ने भएकाले सम्मानस्वरुप नाम सिफारिस गरिएको बताइन् । केन्द्रको परिपत्र भए पनि जिल्लाको विशिष्ट परिस्थितिका कारण यो निर्णय लिइएको उनको भनाइ छ ।
यस्तै प्रतिनिधिसभा समानुपातिकतर्फ हुम्लाबाट बलबहादुर लामा, तारा बहादुर लामा र रम्बा शाहीको नाम सिफारिस गरिएको छ । यस्तै राष्ट्रिय सभा सदस्य खुलातर्फ पदमबहादुर लामाको नाम एकल सिफारिस गरिएको छ भने महिलातर्फ रंगमति शाही र सविता बुढाको नाम सिफारिस भएको छ ।