संसद्‌मा कांग्रेस सांसदहरूको नाराबाजी (तस्बिरहरू)

प्रतिनिधिसभा बैठकमा प्रमुख प्रतिपक्षी दल नेपाली कांग्रेसका सांसदहरूले नाराबाजी जारी राखेका छन्। आज पनि संसद्मा उभिएका कांग्रेस सांसदहरूले संसदीय छानबिन समिति गठन गर, सहकारी पीडितहरूलाई न्याय दे भन्दै नाराबाजी जारी राखेका हुन्।

प्रतिनिधिसभा बैठक सुरु हुनासाथ प्रमुख प्रतिपक्ष दल नेपाली कांग्रेसका सांसदहरू नाराबाजी गर्दै बेल घेराउ गर्न पुगेका थिए। सभामुख घिमिरेले बैठकमा शून्य र विशेष समय नरहेको जानकारी गराउँदै राष्ट्रपतिबाट आएका पत्रहरू सुनाउनुपर्ने बताएका थिए।

तर प्रमुख प्रतिपक्ष दल नेपाली कांग्रेसका सांसदहरुले संसदीय समिति गठनको माग गर्दै गरिएको नाराबाजी नरोकेपछि खाद्य स्वच्छता तथा गुणस्तर सम्बन्धी विधेयक प्रमाणीकरण गरिएको पत्र पढे। लगत्तै प्रधानमन्त्री तथा मन्त्रिपरिषद्को कार्यालयबाट कार्यभार तोकिएको पत्र पढेर सुनाए।

पत्र पढिरहँदा अन्य प्रतिपक्ष दलहरू लोकतान्त्रिक समाजवादी पार्टी र राष्ट्रिय प्रजातन्त्र पार्टी समेतले उठेर विरोध जनाएका थिए।

सभामुखले गृहमन्त्रीलाई बोल्न समय दिएसँगै संसद्मा होहल्ला भएको थियो भने नाराबाजी अझै बढेको थियो। सत्तापक्षका सांसदहरू समेत उठेर प्रतिपक्षी सांसदहरुको प्रतिवाद गर्न थालेपछि संसद् बैठकलाई सभामुखले शुक्रबार बिहान ११ बजे बस्नेगरी स्थगित गरे।

तस्बिरहरू : प्रदीपराज वन्त