नासाका वैज्ञानिकले नेपालगन्जका विद्यार्थीलाई अनुभव सुनाउने

नासाका वैज्ञानिक डा. रायन जेइग्लरले नेपालगन्जका विद्यार्थीलाई आफ्नो अनुभव सुनाउने भएका छन्। स्काईमिट नक्षेत्रालयको समन्वयमा उनी पहिलो पटक नेपालगन्ज आउन लागेका हुन्।

यही जेठ ८ गते नेपालगन्जमा एक कार्यक्रमकाबीच चन्द्रमाको विकास, चन्द्रमा उल्का पिण्डहरु र अपोलो माटोमा भेटिएका साना काँचका टुक्राबारे गरिएको अनुसन्धानका विषयमा विभिन्न विद्यालयका विद्यार्थीलाई अवगत गराउने कार्यक्रम रहेको छ।

नेपालगन्जमा बिहीबार पत्रकार सम्मेलन गर्दै स्काईमिट नक्षेत्रालयका प्रमुख निरज श्रेष्ठले लामो प्रयासपछि नासाका वैज्ञानिक डा. रायन नेपाल आउन लागेको बताए।

उनले उक्त कार्यक्रममा नेपालगन्जका करिब ८ वटा विद्यालयबाट एक हजार ५ सय विद्यार्थी सहभागी हुने जानकारी दिए। ‘कार्यक्रममा कक्षा ८, ९ र १० का विद्यार्थी सहभागी हुनेछन्,’ श्रेष्ठले भने ‘विद्यार्थीका लागि यो ठुलो अवसर पनि हो।’