चुलीको पानी मान्ममा

चुलिमालिका बृहत् खानेपानी आयोजनाको पानी सदरमुकाम मान्म झारिएको छ। २०७८ सालबाट निर्माण सुरु गरिएको आयोजनाको पानी शुक्रबार सदरमुकामको ट्याङ्कीमा खसालिएको हो।

खानेपानी तथा ढल व्यवस्थापन आयोजनाले २८ करोडमा टेन्डर गरेको थियो, तर कम्पनीले भने घटेर १३ करोड ७१ लाख २९ हजार बजेटमा निर्माण कार्य सुरु गरेको थियो। आयोजनाको मुख्य पाइपलाइनको लम्बाइ साढे १० किलोमिटरभन्दा बढी रहेको निर्माण कम्पनी पराजुली कन्ट्रक्सन प्रालिका साइट सुपरभाइजर मानबहादुर थापाले बताए।

खानेपानीको चरम अभाव रहेको सदरमुकाम मान्म बजारमा पानी पुगेपछि बजारवासी खुसी देखिएका छन्। खानेपानी सदरमुकाममा पुगे पनि घरघरमा खानेपानी पुर्‍याउन अझै केही समय लाग्ने थापाको भनाइ छ।

चुली खानेपानी आयोजना निर्माणका लागि तत्कालीन नगर प्रमुख जसीप्रसाद पाण्डेको विशेष पहलमा खानेपानी आयोजनाको काम सुरु गरिएको थियो। खानेपानीका साथै ढल व्यवास्थापनका लागि पहल गरेका पाण्डे मान्मका जनताका लागि खानेपानी भने पुर्‍याउन सफल भएका छन्।

उनी भन्छन्, ‘खानेपानीका लागि सुख्खा रहेको वडा नम्बर १ देखि ४ सम्मका जनताका घरघरमा धारा निर्माण गरी खानेपानी पहुँच पु¥याउन आफू नगर प्रमुख भएको समयमा पटकपटक लागिपरेको र असम्भवका बिच मान्म पानी पुर्‍याउन सकिएको हो।’ पानीसँगै ढलका लागि पनि व्यवस्थापन गरिएको उनको भनाइ छ।

जनतामाझ धेरै लोकप्रिय रहेका पाण्डेले २०७४ देखि ७९ सम्म खाँडाचक्र नगरपालिकामा शिक्षा, स्वास्थ्य, सडक, खानेपानीलगायतका क्षेत्रमा धेरै विकास गरिएको स्थानीय रवीन्द्र विश्वर्माले बताए। चुलिमालिका बृहत् आयोजनाले वडा नम्बर १ देखि ४ सम्मका १३ सय घरमा एक घर एक घाराको लक्ष्य राखेको छ।

सदरमुकाम मान्ममा १ लाख २५ हजार लिटरका २ वटा, ५० हजार लिटरका २ वटा, ४० हजार लिटरको १ वटा र २५ हजार लिटरको १ वटा गरी जम्मा ६ वटा ट्याङ्की रहेका छन्। बजारदेखि गाउँसम्मको लाइन पनि व्यवस्थापन गरिएको छ।

जहिले खानेपानी अभाव रहने मान्ममा चुलिमालिका बृहत् खानेपानी आयोजना नियमित रुपमा सुरु भएका कालिकोटका नागरिकलाइ धेरै राहत हुने विश्वास छ।