एमाले भक्तपुर जिल्ला अधिवेशन : दुईवटा प्यानलद्वारा उम्मेदवारी दर्ता

नेकपा (एमाले) भक्तपुर जिल्ला कमिटीको नवौं अधिवेशनको अन्तिम दिन शुक्रबार दुईवटा प्यानलले उम्मेदवारी दर्ता गराएका छन्।

बिहीबारदेखि सुरु भएको दुईदिने अधिवेशनको अन्तिम दिन पार्टी पोलिटब्युरो सदस्य महेश बस्नेत र वर्तमान अध्यक्ष तथा उपाध्यक्षको संयुक्त प्यानल गरी दुईवटा प्यानलले उम्मेदवारी दर्ता गराएका हुन्।

साँंझ सात बजेबाट मतदान तालिका राखिएको छ। नौ बजेभित्र मतदात सकाउने र मतगणना पनि सुरु हुने बताइएको छ। मेसिनमार्फत मतगणना हुने भएकाले निर्धारित समयमा मतदान सकिए नतिजा पनि आजै सार्वजनिक हुने कार्यक्रम छ।

एमाले भक्तपुरमा वर्चश्व राख्दै आएका पार्टी केन्द्रीय सदस्यसमेत रहेका बस्नेत र उनीविरुद्धको गरी दुईवटा प्यालनले उम्मेदवारी दर्ता गराएका छन्।

बस्नेतले पार्टी जिल्ला सचिव मोहनवीर श्रेष्ठको अध्यक्षतामा प्यानल तयार पारेका छन्। बस्नेतको प्यानलबाट अध्यक्षमा वर्तमान सचिव श्रेष्ठ, उपाध्यक्षमा बागमती प्रदेशका भक्तपुर क्षेत्र नं २ ख बाट प्रदेश सदस्य रहेका किरण थापा, सचिवमा शम्भुप्रसाद दाहाल र दुईजना उपसचिवमा राजकुमार जोशी (सूर्यविनायक नगरपालिका ५ का वडाध्यक्ष) र उतरा नेपाल (मध्यपुर थिमि नगरपालिकाको उपमेयर उम्मेदवार पराजित) रहेका छन्।

उता त्यसविरुद्धको प्यानलमा वर्तमान पार्टी अध्यक्ष वचन देउजा, वर्तमान पार्टी उपाध्यक्ष वासुदेव थापा (सूर्यविनायक नगरपालिकाका मेयर) को उम्मेदवारी परेको हो। वर्तमान अध्यक्ष र उपाध्यक्षको नेतृत्वको प्यानलमा अध्यक्षमा देउजा नै, उपाध्यक्ष वर्तमान उपाध्यक्ष वासुदेव थापा नै, सचिवमा विष्णु तामाङ र दुईजना उपसचिवमा सानुकाजी कायस्थ (सूर्यविनायक नगरपालिका १ का वडाध्यक्ष) र सुचित्रा श्रेष्ठलगायतको प्यानल रहेको छ।

देउजालाई अध्यक्ष बनाउन बस्नेत तथा पूर्व जिल्ला अध्यक्ष राजेन्द्र राजथलाको प्यानलबाट खासै असहमति थिएन, तर उपाध्यक्षमा वर्तमान उपाध्यक्ष एवं सूर्यविनायक नगरपालिकाका मेयर वासुदेव थापा हटोस् भन्ने चाहना हो। यस हिसाबले खास द्वन्द्व बस्नेत र वासुदेव थापाबीच नै हो। बस्नेत थापालाई माइनस गर्न चाहन्छन् तर अध्यक्ष देउजा थापालाई नै उपाध्यक्ष बनाउन चाहन्छन्। यही द्वन्द्वमा दुईवटा प्यानल खडा भएको बताइएको छ।

अधिवेशनमा जिल्लाका चार नगरपालिकाबाट चार सय ९८ मतदाता रहेका छन्। त्यसमध्ये सूर्यविनायक नगरपालिकाबाट एक सय ३१, चाँंगुनारायण नगरपालिकाबाट ७२, मध्यपुर थिमी नगरपालिकाबाट ५१ र भक्तपुर नगरपालिकाबाट १६ जना रहेका छन्।

यसबाहेक जनवर्गीयलगायतका विभिन्न समितिबाट मतदाता अधिवेशन प्रतिनिधि रहेका छन्। पार्टी विधानमा व्यवस्था भएअनुसार आयोजक कमिटी, सल्लाहकार कमिटी, भूगोल कमिटी, जनसंगठन र मनोनीतसहित चार सय ९८ जना प्रतिनिधि चयन गरिएको थियो। अधिवेशन भक्तपुर सल्लाघारीको चुनदेवीस्थित इम्पेरियल ब्यांकेटमा भइरहेको छ।