काठमाडौं। स्पेनमा दुईवटा उच्च गतिको रेल आपसमा ठोक्किँदा कम्तीमा ६८ जनाको मृत्यु भएको छ भने ८० जना घाइते भएका छन्। घाइतेमध्ये केहीको अवस्था गम्भीर रहेको अन्तर्राष्ट्रिय सञ्चारमाध्यमले जनाएका छन्।
बुधबार (अक्टोबर २८) स्पेनको टोलेडो प्रान्तस्थित उर्दा क्षेत्रनजिकै दुर्घटना भएको हो। राजधानी म्याड्रिडबाट दक्षिणी सहर सेभिलतर्फ जाने रेलमार्गमा एउटा उच्च गतिको रेल रोकिराखिएको अर्को रेलको पछाडिबाट ठोक्किएको बताइएको छ। दुर्घटनामा सरकारी रेल कम्पनी रेन्फे र निजी कम्पनी इरियोद्वारा सञ्चालित रेल संलग्न थिए। ठक्करपछि केही डिब्बा लिकबाट खसेका थिए भने दुईवटा डिब्बा सडकछेउको भिरालो भागमा खसेको विवरण सार्वजनिक भएको छ।
दुर्घटनालगत्तै उद्धारकर्मी, अग्निनियन्त्रक र सुरक्षाकर्मी घटनास्थलमा परिचालन गरिएको थियो। घाइतेलाई नजिकका अस्पतालमा लगिएको छ भने उद्धार टोलीले भग्नावशेषमा फसेका यात्रुको खोजी तथा उद्धार कार्य जारी राखेको छ। स्पेनका यातायातमन्त्री ओस्कार पुएन्तेका अनुसार रेलमार्गको सुरक्षा प्रणालीमा देखिएको प्राविधिक समस्यापछि रेल सञ्चालन नियन्त्रण केन्द्रको निर्णयमाथि प्रश्न उठेको छ।
सुरक्षा प्रणालीमा समस्या देखिएपछि रोकिएका रेलमध्ये एउटालाई पुनः सञ्चालन गर्न अनुमति दिइएको थियो। तर, अगाडि अर्को रेल रोकिएको अवस्थामा पनि रेललाई अघि बढ्न कसरी अनुमति दिइयो भन्ने विषयमा अनुसन्धान भइरहेको छ। अधिकारीहरूले दुर्घटनाको वास्तविक कारण पत्ता लगाउन विस्तृत अनुसन्धान भइरहेको जनाएका छन्। प्रारम्भिक विवरणका आधारमा कुनै व्यक्ति वा निकायलाई दोषी ठहर गरिएको छैन।
स्पेनका प्रधानमन्त्री पेद्रो सान्चेजले दुर्घटनाप्रति दुःख व्यक्त गर्दै मृतकका परिवार तथा घाइतेप्रति समवेदना प्रकट गरेका छन्। उनले दुर्घटनाको कारण पत्ता लगाउन र सम्भावित सुरक्षा कमजोरीको छानबिन गर्न सरकार प्रतिबद्ध रहेको बताएका छन्। दुर्घटनापछि म्याड्रिड र दक्षिणी स्पेनबीच सञ्चालन हुने उच्च गतिको रेल सेवा प्रभावित भएको छ। सरकारले अक्टोबर २९ देखि ३१ सम्म तीन दिन राष्ट्रिय शोक मनाउने घोषणा गरेको छ।
यस वर्ष स्पेनमा भएको यो दोस्रो ठूलो रेल दुर्घटना भएको समाचारमा उल्लेख छ। यसअघि जनवरीमा दक्षिणी स्पेनको अदामुज क्षेत्रमा भएको रेल दुर्घटनामा ४६ जनाको मृत्यु भएको थियो। पछिल्लो दुर्घटनाले स्पेनको उच्च गतिको रेल सेवाको सुरक्षा व्यवस्थामाथि पुनः प्रश्न उठाएको छ। घटनाको अनुसन्धान तथा मृतकको पहिचान गर्ने कार्य जारी रहेको अन्तर्राष्ट्रिय सञ्चारमाध्यमले जनाएका छन्।