ललितपुरमा चोरी गर्ने ६ जना पक्राउ

ललितपुरमा सुनचाँदीका गहना र नगद चोरीमा संलग्न ६ जनालाई प्रहरीले पक्राउ गरेको छ।

ललितपुर महानगरपालिका-२१ खोकनाका नवराज गुरुङको घरमा चोरी गरेको आरोपमा ६ जनालाई काठमाडौं उपत्यका अपराध अनुसन्धान कार्यालयले पक्राउ गरेको हो।

गत वैशाख ७ देखि ९ गतेको बिचमा नवराज गुरुङको घरमा कोही पनि नभएको समयमा सुन–चाँदीका गरगहनाहरू तथा आईफोन लगायतका धनमाल चोरी भएको थियो।

काठमाडौँ उपत्यका अपराध अनुसन्धान कार्यालयले घटनाको अनुसन्धान गर्दा चोरीमा संलग्न रहेका ६ जनाबाट चोरीका सामानसहित पक्राउ गरेको बताइएको छ।

पक्राउ पर्नेमा रामेछाप दोरम्बा गाउँपालिका–४ घर भई ललितपुर–१५ खुमलटार बस्ने ३७ वर्षीय कमल थापा मगर र ३५ वर्षीय धनलाल थापा मगर, सिन्धुपाल्चोकको मेलम्ची नगरपालिका-६ का २८ वर्षीय सुवास सुनार, काठमाडौं मुलपानी बस्दै आएका ४१ वर्षीय रेशम बिक, टोखा नगरपालिका-३ का ४१ वर्षीय योगेश डाँगी र सप्तरीको सुरुंगा-१४ का मोहम्मद समिर रहेका छन्।

पक्राउ परेका डाँगी न्यूरोड ताम्राकार कम्पलेक्सको मोवाइल पसल संचालक हुन्। उनले चोरी भएको बोबाइल किनबेच गरेक प्रहरीको भनाइ छ। समिर पनि मोबाइल किनबेचमा संलग्न भएका हुन्।

उनीहरूलाई फरक-फरक दिन फरक-फरक ठाउँबाट पक्राउ गरिएको प्रहरीले बताएको छ। यसबारे थप आवश्यक अनुसन्धान भैइरहेको छ।