कांग्रेसले रवि लामिछानेमाथि नै छानबिन गर्नुपर्छ भन्ने कुरा न्यायसङ्गत छैन: रास्वपा

राष्ट्रिय स्वतन्त्र पार्टी (रास्वपा) का सांसद शिशिर खनालले सहकारी ठगी प्रकरणमा प्रमुख प्रतिपक्ष नेपाली कांग्रेसले गृहमन्त्री रवि लामिछानेमाथि मात्र छानबिन गर्नुपर्छ भन्नु न्यायसङ्गत नभएको बताए।

सिंहदरबारमा आइतबार दिनभर बसेको कार्यदलको बैठकपछि पत्रकारसँग कुरा गर्दै खनालले कांग्रेसले लामिछानेमाथि मात्र छानबिन गर्नुपर्छ भन्ने प्रस्ताव ल्याएको र त्यो न्यायसङ्गत नभएको बताएका हुन्।

उनले भने, ‘समितिले कसलाई दोषी करार गर्छ, त्यो एउटा कुरा हो। आजको दिनमा नै एउटा व्यक्तिलाई दोषी करार गरेर छानबिन गर्नुपर्छ भन्ने न्यायसङ्गत हुँदैन। समितिको टिओआर बनाउँदै नै व्यक्तिको नाम किटान गरी छानबिन गर्नुपर्छ भन्नु न्यायसङ्गत हुँदैन।’