प्रतिनिधि सभा कार्यव्यवस्था परामर्श समितिको बैठक संसद भवनमा सुरू

प्रतिनिधि सभाको कार्यव्‍यवस्था परामर्श समितिको बैठक सुरू भएको छ। सोमबार अहिले बानेश्वरस्थित संघीय संसद भवनमा समितिको बैठक सुरू भएको हो।

नेपाली कांग्रेसको संसदीय दलको बैठकका कारण १० बजेका लागि बोलाइएको बैठक ढिलो गरी सुरू भएको संसद सचिवालयले जनाएको छ।

सोमबार प्रधानमन्त्री पुष्पकमल दाहालले विश्वासको मत लिने तयारी छ। प्रधानमन्त्री कार्यालयले विश्वासको मत लिने भन्दै संसद सचिवालयमा पत्र पठाएका थियो। त्यसबारे छलफल गर्न परामर्श समितिको बैठक बसेको हो। बैठकमा विभिन्न दलका प्रमुख सचेतकहरू सहभागी छन्।

बैठकमा सभामुख देवराज घिमिरेले विश्वासको मत लिने प्रस्तावमा अवरोध नपुर्‍याउन अनुरोध गरेका छन्। प्रमुख प्रतिपक्षी र प्रतीपक्षी दलहरूलाई प्रस्तावलाई प्रभावित नबनाउन भन्दै सभामुख घिमिरेले ध्यानाकर्षण गराएका छन‍।