प्रत्यक्षतर्फका १२ निर्वाचन क्षेत्रबाट ५६ जनाको नाम सिफारिस, हुम्लामा निर्णयविपरित
वर्तमान सरकारले घोषणा गरेको प्रतिनिधि सभा निर्वाचन नजिकिएसँगै तिव्र पारेको उम्मेदवार सिफारिसको काम जिल्लाहरुबाट लगभग टुंगिएको छ । नेपाली काँग्रेसले आफ्नो १५ औं महाधिवेशन पनि पुस २६ देखि २८ गतेसम्म तोकेको छ । महाधिवेशनअघि काँग्रेसले प्रतिनिधि सभा र राष्ट्रिय सभा निर्वाचनका लागि उम्मेदवार टुंग्याउने कामलाई तिव्रता दिएको थियो । यसअघिका निर्वाचनमा उम्मेदवार तोक्न सँधै अन्तिममा हुने काँग्रेसले यस पटक भने सुरुमा गर्न थालेको हो । प्रतिनिधि सभा र राष्ट्रिय सभा निर्वाचन–२०८२ का लागि पार्टीले मंसिर १५ गत वैठक बसेर उम्मेदवार सिफारिस गर्न जिल्ला र प्रदेश समितिहरुलाई निर्देशन दिएको थियो । पार्टीले एउटा मात्र निर्वाचन क्षेत्र भएको जिल्लाबाट मंसिर २६ गतेसम्म र दुई वटा निर्वाचन हुने जिल्लाबाट मंसिर २९ गतेभित्र उम्मेदवारका आकांक्षीहरुको नामा प्रदेश समितिमा पठाइसक्न भनेको थियो । पार्टीले हाल संसदमा रहेका पदाधिकारीलाई उम्मेदवारको रुपमा सिफारिस नगर्न पनि निर्देशन दिएको थियो ।
कर्णाली प्रदेशका जिल्लाहरुबाट पनि उम्मेदवारका आकांक्षीहरुको सूची कर्णाली प्रदेश समितिलाई प्राप्त भइसकेको छ । कर्णालीमा दैलेख र सुर्खेतबाहेक ८ जिल्लामा एक–एक वटा प्रनिनिधि सभा निर्वाचन क्षेत्र छन् । प्रदेशका दश वटै जिल्लाबाट सोमबारसम्म उम्मेदवारका आकांक्षीको नाम सिफारिस भएर आएको नेपाली काँग्रेस कर्णाली प्रदेश समितिका प्रवक्ता दमन शाहीले जानकारी दिए । जिल्लाबाट सिफारिस भएको उम्मेदवार कसैले पनि आफ्नो नाम फिर्ता नलिएको उनले बताए । अब उनीहरुको नाम केन्द्र समितिमा पठाउने तयारी भईरहेको उनले बताए । ‘जिल्लाबाट सबै सूची आइसकेको छ, आज (मंगलबार) निर्णय गरी केन्द्रमा पठाउने कुरा थियो । पार्टी कार्यालय बन्द गर्ने निर्णय भएकाले पठाईएन,’ प्रवक्ता शाहीले भने, ‘अब यसपछि तत्काल निर्णय गरेर जस्ताको तस्तै केन्द्रमा सूची पठाउँछौं ।’ नेपाली काँग्रेसका पूर्वकेन्द्रीय सदस्य अमोदप्रसाद उपाध्यायको निधनमा मंगलबार देशभरका पार्टी कार्यालय बन्द गर्ने निर्णय भएको थियो ।
कर्णालीका कुन जिल्लाबाट कसको नाम सिफारिस ?
नेपाली काँग्रेसको उम्मेदवार सिफारिस तालिकाअनुसार कर्णाली प्रदेशका दशवटा जिल्लामध्ये सुर्खेत र डोल्पामा सबैभन्दा पहिले उम्मेदवारको नाम सिफारिस गरिएको थियो । सुर्खेत र डोल्पामा मंसिर २३ गते नै उम्मेदवार सिफारिस गरिएको थियो । प्रदेशका प्रत्यक्षतर्फका १२ निर्वाचन क्षेत्रबाट ५६ जनाको नाम उम्मेदवारका लागि सिफारि भएको छ ।
प्रतिनिधि सभातर्फ दुई निर्वाचन क्षेत्र रहेको सुर्खेतको क्षेत्र न १ बाट कांग्रेसका कार्यवाहक सभापति पूर्णबहादुर खड्का एकल सिफारिस भएका छन् । यो क्षेत्रबाट समानुपातिकतर्फ नरबहादुर सोनी र भिमा मल्लको नाम सिफारिस भएको छ । खड्का २०४८ यता यही निर्वाचन क्षेत्रबाट चुनाव लड्दै आएका छन् । उनले २०७४ को प्रतिनिधि सभाव निर्वाचनबाहेक सबै निर्वाचनमा जितेका छन् । २०६४ मा भने उनी समानुपातिक निर्वाचन प्रणालीमार्फत संसदमा गएका थिए । २०४८, २०५६ को आम निर्वाचनमा पनि उनी यही क्षेत्रबाट निर्वाचित भएका थिए ।
यस्तै, सुर्खेत क्षेत्र नम्बर २ बाट निवर्तमान प्रतिनिधिसभा सदस्य हृदयराम थानीसहित ६ जनाको नाम सिफारिस भएको छ । थानी २०७९ को प्रतिनिधिसभा निर्वाचनमा पनि यहीँ क्षेत्रबाट निर्वाचित भएका थिए । २०७४ मा उनी पराजित भए । २०७० सालको संविधान सभा निर्वाचन र २०५६ सालको आम निर्वाचनमा पनि उनी यही क्षेत्रबाट निर्वाचित भएका थिए । सुर्खेत २ बाट प्रत्यक्षतर्फ नारायण कोइराला, उपेन्द्र थापा, कलम खत्री, भिस्म हमाल र बसन्ती बस्नेत जिसीको नाम सिफारिस भएको छ । समानुपातिकतर्फ पनि पाँच जनाको नाम सिफारिस गरिएको छ । समानुपातिकतर्फ गंगा नेपाली बस्याल, पार्वती गिरी, धना बिष्ट, भिम शाही नेपाली र भगे कामीको नाम सिफारिस गरिएको छ ।
नेपाली कांग्रेस कालीकोटले प्रतिनिधि सभा निर्वाचनका लागि पहिलो नम्बरमा भुपेन्द्रजंग शाहीलाई सिफारिस गरेको छ । जिल्ला सभापति अम्बबहादुर शाही र महिलातर्फ सिता रावलको नाम सिफारिस प्रत्यक्ष निर्वाचनका लागि उम्मेदवार सिफारिस गरिएको छ । समानुपातिकतर्फ खसआर्यमा कालीबहादुर सहकारी, महिलामा सुशिला शाही बम र दलितमा मनबहादुर नेपालीलाई सिफारिस गरिएको छ । माघ ११ गते हुने राष्ट्रियसभा निर्वाचनका लागि टेकराज शाही र यशोधा शाहीको नाम उम्मेदवारका रुपमा सिफारिस गरिएको छ ।
हुम्लाबाट प्रदेशसभा सदस्यसमेत रहेका नेपाली कांग्रेस संसदीय दलका नेता जीवनबहादुर शाहीलाई आगामी प्रतिनिधि समा निर्वाचनको उम्मेदवारका रुपमा सिफारिस गरिएको छ । जुन पार्टीको ‘बहालवाला जनप्रतिनिधिलाई उम्मेदवार नबनाउने’ निर्णय र निर्देशनको विपरित छ । यस्तै जयपति रोकाया र रिता शाहीको नाम पनि प्रत्यक्षतर्फको उम्मेदवारको रुपमा सिफारिस गरिएको छ । हुम्लाबाट समानुपातिकतर्फ बलबहादुर लामा, ताराबहादुर लामा र रम्बा शाहीको नाम सिफारिस गरिएको छ ।
जाजरकोटबाट प्रत्यक्षतर्फ कांग्रेसले पाँच जनाको नाम सिफारिस भएको छ । जसमा जिल्लाका कार्यवाहक सभापति खड्गबहादुर बुढा, मैना कार्की, मुक्तिप्रसाद आचार्य, महेन्द्रबहादुर शाह र रामजंग शाह रहेका छन् । समानुपातिकतर्फ जाजरकोटबाट रामछाया शाही, हजारी नेपाली बादी, भूमिलाल रोकाय, जनक बादी र विष्णु गिरीको नाम सिफारिस भएको छ । राष्ट्रियसभाको निर्वाचनका लागि पूर्व पार्टी सभापति दीपकजंग शाह, खम्बजंग शाह र गीता नेपालीलाई उम्मेवार सिफारिस गरिएको छ ।
प्रतिनिधिसभा प्रत्यक्षतर्फ सल्यानबाट ६ जनाको नाम सिफारिस भएको छ । जसमा केशरबहादुर विष्ट, सन्तोष केषी, एकराज डाँगी, मानबहादुर डाँगी, दीपेन्द्रकुमार खत्री र सुरेश चन्द छन् । यस्तै समानुपातिकतर्फ चक्र देवकोटा, प्रेमबहादुर डाँगी, बिरबहादुर सेजुवाल, गणेश चन्द, ध्रुवबहादुर मल्ल, शुभद्रा बस्नेत, सीता गिरी, विष्णुकुमारी शर्मा र चक्रबहादुर परियारको नाम सिफारिस भएको छ । राष्ट्रिय सभाको उम्मेदवारका रुपमा ध्रुवराज पुरीको एकल नाम सिफारिस भएको छ ।
रुकुम पश्चिमबाट प्रतिनिधिसभाको प्रत्यक्षतर्फ प्रेमप्रकाश ओली, गोपाल जी गंग शाहको नाम सिफारिस भएको छ । समानुपातिकतर्फ मानबहादुर नेपाली र मनिषा भण्डारीको नाम सिफारिस भएको कांग्रेस रुकुम पश्चिमले जनाएको छ । राष्ट्रियसभातर्फ वीरबहादुर ओलीको नाम सिफारिस भएको छ ।
दुई निर्वाचन क्षेत्र रहेको दैलेखमा क्षेत्र नम्बर १ बाट प्रत्यक्षतर्फ १३ जनाको नाम सिफारिस भएको छ । खेमराज केसी, खेमराज वली, गणेशप्रसाद उपाध्याय, देवेन्द्रबहादुर थापा, नगेन्द्रबहादुर मल्ल, नरसिंह मल्ल, पदमबहादुर मल्ल, बखतबहादुर कटुवाल, बासना थापा, भूपेन्द्र शाही, मणिराज रेग्मी, मनोजकुमार थापा र सुशील देउजाको नाम सिफारिस भएको हो । क्षेत्र नम्बर १ बाट प्रतिनिधिसभा समानुपातिकतर्फ कुलबहादुर विश्वकर्मा, दिपक सोनी, दुर्गा श्रेष्ठ, निर्मलाकुमारी थापा, मिनाकुमारी थापा र मोहनमाया प्याकुरेल र गणेशबहादुर बोगटीको नाम सिफारिस भएको छ । यस्तै राष्ट्रियसभातर्फ किशोरी केसी, रंगबहादुर शाही, खड्कबहादुर सिजापती, नगेन्द्रबहादुर खत्री, सीता ज्ञवाली र हिक्मतबहादुर विश्वकर्माको नाम सिफारिस भएको छ ।
दैलेख क्षेत्र नम्बर २ बाट प्रतिनिधिसभा प्रत्यक्षतर्फ ९ जनाको नाम सिफारिस भएको छ । जसमा निवर्तमान प्रत्यक्षतर्फको निवर्तमान प्रतिनिधिसभा सदस्य दिक्पालकुमार शाही र समानुपातिकतर्फ सीताकुमारी रानाको नाम अग्रपंक्तिमा छ । त्यसपछि मधुर विक्रम खनाल, रन्जनाकुमारी शाही, बखतबहादुर शाही, लोकेशप्रसाद आचार्य, चन्द्रबहादुर शाही, नारायणप्रसाद रेग्मी, एकेन्द्रबहादुर पन्तको नाम पनि उम्मेदवारका लागि सिफारिस भएको छ । यो क्षेत्रबाट प्रतिनिधिसभा समानुपातिकतर्फ सूर्यबहादुर विक, शेरबहादुर शाही, जानकीकुमारी बिष्ट, पूर्णबहादुर थापा, सुमित्रा शाह, भगवती प्रसाद उपाध्याय, लिलाराम उपाध्यायको नाम सिफारिस भएको छ । राष्ट्रिय सभातर्फ शिवराज जोशी, रंगबहादुर शाही, हिमबहादुर शाही, प्रेमप्रकाश शाही, राजेश शाही र खड्गबहादुर शाहीको नाम सिफारिस गरिएको छ ।
नेपाली काँग्रेस जुम्लाले प्रतिनिधिसभा प्रत्यक्षतर्फ जिल्ला सभापति कर्णबहादुर शाही, निर्वतमान सांसद कान्तिका सेजुवाल, पूर्णप्रसाद आचार्य र खड्गबहादुर सेजुवाललाई सिफारिस गरेको छ । समानुपातिकतर्फ दिनबन्धु श्रेष्ठ, धनबहादुर बस्नेत, गोविन्द शाही, पुरिचन्द्र देवकोटा, लक्ष्मीप्रसाद आचार्य, परेकलाल घर्ती, गोरखबहादुर सुनार, माया नेपाली, नेत्रकला शाही, कर्णजंग हमाल, नविना केसी बडुवाल, जयलक्ष्मी आचार्य, लालबहादुर जिसी र रज्जब अलिमनिहारको नाम सिफारिस गरिएको छ । राष्ट्रिय सभातर्फ काँग्रेसका कर्णाली प्रदेश सभापति ललितजंग शाही, पूर्वराज्यमन्त्री भक्तबहादुर रोकाया, भिमनिधि हमाल र सुमन बुढा बस्नेतको नाम सिफारिस गरिएको छ ।
मुगुबाट निवर्तमान वन तथा वातावरण मन्त्री ऐनबहादुर शाहीसहित ३ जनाको नाम प्रतिनिधिसभाको प्रत्यक्षतर्फको उम्मेदवारका लागि सिफारिस भएको छ । पार्टीका पूर्व जिल्ला सभापति खडकबहादुर शाही, रमाइली रावलको नाम पनि प्रत्यक्षतर्फको उम्मेदवारका लागि सिफारिस गरिएको छ । मीन भाम, भीम तिरुवा र केशरकला मल्लको नाम समानुपातिकतर्फका उम्मेदवारका लागि जिल्लाले सिफारिस गरेको छ । राष्ट्रियसभातर्फ मुगुबाट पूर्वशिक्षा राज्यमन्त्री हस्तबहादुर मल्लको एकल नाम सिफारिस भएको छ ।
नेपाली कांग्रेस डोल्पाले प्रत्यक्षतर्फ कर्णबहादुर बुढाको एकल नाम सिफारिस गरेको छ । समानुपातिकतर्फ तीन जनाको नाम सिफारिस भएको छ । जसमा टंकप्रसाद उपाध्याय, जयकुमारी शाही, रमादेवी न्यौपाने छन् । आगामी माघ ११ मा हुने राष्ट्रियसभा सदस्यको निर्वाचनका लागि दुधकुमारी हमाल, राजीमान सार्की र जुना मिजारको नाम सिफारिस भएको छ ।
