युक्रेनका पूर्वसभामुखको गोली हानी हत्या

युक्रेनको पश्चिमी शहर एल्भिभमा शनिबार एक सांसदको गोली हानी हत्या गरिएको छ। सांसदको गोली हानी हत्या भएको भन्ने खबरलाई राष्ट्रपति भोलोदिमिर जेलेन्स्कीले पुष्टि गरेका छन्।

जेलेन्स्कीले सन् २०१० को दशकमा संसदीय सभामुख रहेका चर्चित राजनीतिज्ञ एन्ड्री पारुबीको हत्याको विस्तृत अनुसन्धान गर्ने प्रतिबद्धता व्यक्त गरे। “हत्याराको अनुसन्धान र खोजीमा सबै आवश्यक शक्ति र साधन लगाइएका छन्,” जेलेन्स्कीले सामाजिक सञ्जालमा लेखेका छन्।

प्रहरीका अनुसार ५४ वर्षीय पारुबीको घटनास्थलमै मृत्यु भएको हो। ​​​​​​​आक्रमणकारीको खोजी भइरहेको र हत्याको कारण भने खुल्न नसकेको प्रहरीले जनाएको छ।

सन् २०१६ देखि सन् २०१९ सम्म संसदको सभामुख रहेका पारुबी सन् २००४ को युरोप समर्थित ‘ओरेन्ज रिभोलुसन’ र सन् २०१४ को ‘मेडन रिभोलुसन’का प्रमुख समर्थक थिए। उनले युक्रेनको राष्ट्रिय सुरक्षा तथा रक्षा परिषद्को सचिवको रूपमा पनि काम गरेका थिए।