नक्कली विवाह गराएर ठगी गर्ने दुई जना पक्राउ

नक्कली विवाह गराएर ठगी गरेको कसुरमा दुई जना पक्राउ परेका छन् । आमा, बाबु र छोरी बनेर पुरुषसँग विवाह गराउने र विवाहपश्चात गरगहना तथा नगद लिएर भाग्ने गरेको उजुरी परेपछि दुई जनालाई पक्राउ गरिएको जिल्ला प्रहरी कार्यालय सुर्खेतले जनाएको छ ।
उक्त कसुरमा दैलेख घर भई वीरेन्द्रनगर–१० सुर्खेत बस्ने ४० बर्षीय गोपाल विका र अछामको तुर्माखाँदगाउँपालिका–३ घर भई हाल वीरेन्द्रनगर–१० बस्ने ३८ बर्षीया भविसरा रास्कोटी मगर पक्राउ परेका हुन् । गोपाल वीरेन्द्रनगरमा सदाशंकर होटलका सञ्चालक पनि रहेको सुर्खेत प्रहरी प्रवक्ता डिएसपी मोहनजंग बुढथापाले जानकारी दिए ।
‘सामाजिक सञ्जाल फेसबुक लगायतका माध्यमबाट जोडिएर नक्कली आमाबुवा तथा छोरी बनेर ठगी गर्ने मनसायले पुरुषसँग विवाह गर्ने, विवाहपश्चात बेहुलीले नगद तथा गरगहना लगेर वेपत्ता हुने गरेको पाईयो,’ डिएसपी बुढथापाले भने, ‘प्रहरीलाई आएको सूचनाका आधारमा अनुसन्धान गर्दा फरकफरक मितिमा विभिन्न पुरुष व्यक्तीसँग एउटै महिलालाई विहे गराई ठगी गरेको भेटिएको छ ।’
पक्राउ परेका दुवै जनामाथि आपराधिक लाभ तथा ठगी कसुरमा म्याद थप गरी आवश्यक अनुसन्धान भईरहेको उनले जानकारी दिए ।