अन्तरिम सरकारकी प्रधानमन्त्री सुशीला कार्कीले आज मन्त्रीमण्डल बिस्तार गर्दै छिन् । जेन–जी आन्दोलनपछि गत शुक्रबार शीतल निवासमा भएको सहमतिबाट प्रधानमन्त्री बनेकी कार्कीले पूर्वअर्थसचिव रामेश्वर खनाल, नेपाल विद्युत प्राधिकरणका पूर्वकार्यकारी निर्देशक कुलमान घिसिङ र अधिवक्ता ओमप्रकाश अर्याललाई मन्त्री बनाउने तयारी गरेकी छन् ।
बालुवाटारमा चलेको चर्चाअनुसार अर्याललाई गृह, खनाललाई अर्थ र घिसिङलाई ऊर्जा मन्त्रालयको जिम्मेवारी दिइँदै छ । तर, तीनमध्ये अर्यालको नामलाई लिएर जेन–जीहरूमा तरङ्ग फैलिएको छ । जेन–जीहरूले ‘अर्याल आन्दोलन हाइज्याक गरेर गृहमन्त्री खान आएको’ आरोप लगाएका छन् । उनीहरूले आरोप मात्रै लगाएका छैनन्, अर्यालको नाम अघि सारेका कारण आइतबार राति बालुवाटार पुगेर केही घण्टाअगाडि पदभार ग्रहण गरेकी प्रधानमन्त्री कार्कीको राजीनामासमेत माग गरे ।
‘यो खोई के हो लयर, त्यहाँभित्र बसेर गृहमन्त्री बनाउँदो रहेछ, मचाहिँ लास–सासमा हिँडिरहेको थिएँ’, सुदन गुरुङले भने । उनले अगाडि भने, ‘हाम्रो आन्दोलन हाइज्याक भयो । सब्से पावरफुल नेपाली जनता हो । कसैले हामीलाई रोक्न सक्दैन । जुन ठाउँमा लगेर हामीले राखेका छौँ, त्यही ठाउँबाट थुतेर निकाल्दिन्छु ।’
गुल्मीमा जन्मिएका अधिवक्ता अर्याल हाल ललितपुरमा बस्दै आएका छन् । उनको जन्मस्थान गुल्मी हो । उनी काठमाडौं महानगरपालिकाका प्रमुख बालेन शाहका कानुनी सल्लाहकार हुन् । महानगरविरुद्धका मुद्दाहरूमा अर्यालले कानुनी र रणनीतिक सल्लाह प्रदान गर्दै आएका थिए ।
