काठमाडौं महानगरपालिकाका मेयर बालेन शाहले धरान उपमहानगरपालिकाका मेयर हर्क साम्पाङले जति गाली गरे पनि साथ नछोड्ने बताएका छन्। –मंगलबार सामाजिक सञ्जाल फेसबुकमा स्ट्याटस लेख्दै आफूलाई जतिसुकै गाली गरे पनि आफूले माया गर्न नछाड्ने बालेनले बताएका हुन्।’डियर हर्क साम्पाङ, तिमीले मलाई जति गाली गरे पनि म तिमीलाई माया गर्न छोड्दिनँ। एक तर्फी नै सही, तर मेरो माया साँचो हो। यू आर माई ट्रु लभ,’ उनले लेखेका छन्।
केही दिनयता मेयर साम्पाङले मेयर बालेनलाई लक्ष्य गर्दै सामाजिक सञ्जालमा टिप्पणी गर्दै आएका थिए। मेयर साम्पाङले लुकेर खेल्नेलाई लिडर नभनिने बताएका थिए।’लुकेर बस्ने र लुकेर खेल्नेलाई गेमर भनिन्छ, लिडर भनिँदैन,’ उनले लेखेका थिए।यस्तै महानगरका कानुनी सल्लाहकार ओम प्रकाश अर्याल गृह तथा कानुन मन्त्री बनेपछि उनले प्रश्न उठाएका थिए।
‘हिजो सिंहदरबारमा आगो लगाइदिन्छु, जलाइदिन्छु भनेर साँच्चै जलाइदिने र अहिलेको गृहमन्त्री बीचमा कुनै सम्बन्ध छ कि कुनै संयोग मात्रै हो,’ उनले भनेका थिए।भदौ २३ गते जेनजीको नाममा भएको आन्दोलनमा घुसपैठ भएपछि थुप्रै युवाहरू मारिएको थिए। त्यसपछि २४ गते पनि आन्दोलनले विध्वंस रूप लिएको थियो। जसमा आन्दोलनकारीहरूले सिंहदरबार, संसद भवन, सर्वोच्च सदालत लगायत थुप्रै सरकारी कार्यालयहरू तोडफोड गर्नुका साथै कार्यालय जलाइदिएका थिए। आन्दोलनमा परेर ७२ जनाको मृत्यु भइसकेको छ। आन्दोलनमा परी मृत्यु भएकालाई सरकारले शहिद घोषणा गरेको छ भने उनीहरूलाई राहत स्वरूप १५ लाख रुपैयाँ दिने निर्णय भइसकेको छ।
Leave a Reply