रवि लामिछानेलाई जेलबाट भगाउनेमाथि छानबिन हुनुपर्छ: महेश बस्नेत

नेकपा एमालेका पोलिटब्युरो सदस्य महेश बस्नेतले जेनजी आन्दोलनको बहानामा रास्वपा सभापति रवि लामिछानेलाई जेलबाट भगाउनेमाथि छानबिन गर्नुपर्ने बताएका छन् । बुधबार एमाले पार्टी कार्यालयमा युवा संघले आयोजना गरेको पत्रकार सम्मेलनमा नेता बस्नेतले लामिछानेलाई भगाउनेमाथि कारबाही गर्नुपर्ने बताएका हुन् ।
‘२४ गते रवि लामिछानेलाई नख्खु कारागारबाट मुक्त गराउन गएका डीपी अर्याल, मनीष झा र ज्वाला संग्रौलाबारे छानबिन होस्,’ बस्नेतले भने, ‘जेलबाट भागेका १४ हजार कैदीबारे छानबिन होस्, भागेका कैदी कहाँ छन् ? ५ सय चौकी जलाउँदा १२ हजार लुटिएका हतियार कहाँ छन् ?’ प्रहरीबाट लुटिएका हतियारमार्फत नयाँ शक्ति सृजना गरेर विद्रोह गराउने षडयन्त्र हुनसक्ने उनको आशंका छ ।