स्क्रबटाईफ्स र ज्वरोले सल्यानमा दुई जनाको मृत्यु

सल्यानमा स्क्रबटाईफ्स र उच्च ज्वरोले दुई जनाको मृत्यु भएको छ । स्क्रबटाईफ्सका कारण बागचौर नगरपालिका–१ कालाखेतका गजेन्द्र केसी र उच्च ज्वरोका कारण दार्मा गाउँपालिका–३ दुवाङ्गकी ४७ वर्षीया यनकुमारी खत्रीको मृत्यु भएको हो । दुवैको उपचारका क्रममा मृत्यु भएको स्वास्थ्य सेवा कार्यालय सल्यानका प्रमुख डा. अर्जुन बुढाले बताए । उनका अनुसार बागचौर नगरपालिका–१ कालाखेतका गजेन्द्र केसीलाई सुरुमा जिउ दुख्नुका साथै ज्वरो आएको थियो । ज्वरो उच्च भएपछि उनले स्थानीय मेडिकलमा केही दिन उपचार गराएका थिए ।
औषधि सेवनपछि पनि उच्च ज्वरो नरोकिएको र स्वासप्रस्वासमा थप समस्या भएपछि जिल्ला अस्पताल सल्यानमा उपचारका लागि आफन्तले पु¥याएका थिए । लक्षणअनुसार तत्काल स्वास्थ्य परीक्षण गर्दा स्क्रबटाईफ्स देखिएको थियो । जिल्ला अस्पताल सल्यान ल्याएको आधा घन्टा नबित्दै उनको स्वास्थ्यमा बढी समस्या देखिएपछि नेपालगन्ज रेफर गरिएको थियो । नेपालगन्जमै केसीको मृत्यु भएको स्वास्थ्य सेवा कार्यालय सल्यानका प्रमुख बुढाले बताए ।
‘पछिल्नो समयमा सल्यानमा स्क्रबटाईफ्सका बिरामी बढिरहेका छन्, जिल्ला अस्पताल सल्यानमै उपचार भएर घर फर्किसकेका छन्,’ उनले भने, ‘समयमै रोग पहिचान गर्न नसक्दा उपचारमा भएको ढिलाईका कारण केसीले अकालमा ज्यान गुमाउनुपरेको हो ।’ कार्यालयका अनुसार पछिल्लो तीन महिनाको अवधिमा सल्यानमा ७० जनाले जिल्ला अस्पताल सल्यानमा उपचार गराएर फर्किएका छन् । पछिल्नो समयमा सल्यानमा स्क्रबटाईफ्सको जोखिम बढदै गएको र रोग पहिचान गर्न नसकी ज्वरोको जथाभावी औषधि सेवन गर्दा बिरामीको ज्यान जोखिममा पर्दै आएको डा. बुढाले बताए ।