पाप बोक्ने घडा शुद्ध छन् देशमा!

१) मुक्तक

लिई पानी कुद्ने अजब नभको बादल हुँ म

नजिस्क्याऊ धेरै कवि मन हुने पागल हुँ म

गरी किर्ते धन्दा छल र बलले द्रव्य बटुले

तिनैलाई पुर्ने जमिनमुनिको खाडल हुँ म! (शिखरिणी छन्द)

२) मुक्तक

मन्त्र पढ्ने गला रुद्ध छन् देशमा

पाप बोक्ने घडा शुद्ध छन् देशमा

शान्तिका देहमा रक्त देख्दा सधैँ

भन्न गाह्रो भयो बुद्ध छन् देशमा! (स्रग्विणी छन्द)

३) मुक्तक

काँचुली फेर्छु भन्नेको नारा फेरिन्छ रातमा,

लेखिए हक मान्छेका सारा केरिन्छ रातमा

पाएथ्यौँ तन्त्र यो नौलो यहाँ पाएर गर्नु के!

देशका निम्ति चम्केको तारा सेरिन्छ रातमा! (अनुष्टुप् छन्द)

४) मुक्तक

समाई प्रेमको डोरी सँगै बाटौँ तिमी आऊ

हबेली होस् कलेजीमा हियो साटौँ तिमी आऊ

यता आधा उता आधा यही आधा भयो बाधा

भई सिङ्गो खुसी बाँडी जुनी काटौँ तिमी आऊ! (विधाता छन्द)

५) मुक्तक

मिथ्या कुरा नै अति बोल्न थाल्यौ

चाह्यौ खरानी घर पोल्न थाल्यौ

खाँचो परेथ्यो जब औषधीको

छलेर आँखा विष घोल्न थाल्यौ। (उपजाति छन्द)