आमाको हत्या गरेको आरोपमा एक जना पक्राउ

आमा हत्या गरेको अभियोगमा सुर्खेतमा एक जना पक्राउ परेका छन् । शुक्रबार बिहान भेरीगंगा नगरपालिका–१२ मसिना टोलका ३५ बर्षीय कविराम बस्नेतलाई इलाका प्रहरी कार्यालय छिन्चुले पक्राउ गरेको हो । उनीमाथि आमाको हत्या गरेको अभियोग लागेको छ ।
कविरामले आफ्नी ५० वर्षीया आमा धनिकला बस्नेतलाई फरुवा प्रहार गरी हत्या गरेको आरोपमा पक्राउ गरिएको जिल्ला प्रहरी कार्यालय सुर्खेतले जनाएको छ । घरमै सुतिरहेको अवस्थामा कविरामले फरुवाले आमाको टाउकोमा प्रहार गरेको जिल्ला प्रहरी कार्यालय सुर्खेतका प्रवक्ता डिएसपी मोहनजंग बुढथापाले जानकारी दिए ।
फरुवा प्रहारबाट घाइते भएकी धनिकलाको प्रदेश अस्पताल सुर्खेतमा उपचारका लागि लगिएको थियो । उपचारका क्रममा उनको मृत्यु भएको डीएसपी बुढथापाले जानकारी दिए । घटनापछि कविरामलाई इलाका प्रहरी कार्यालय छिन्चुबाट खटिएको प्रहरी टोलीले छिन्चु बजारबाट पक्राउ गरेको हो ।