‘पार्टीको विशेष महाधिवेशन गर्नै हुँदैन’

नेपाली कांग्रेसका केन्द्रीय सदस्य जीवनबहादुर शाहीले पार्टीको विशेष महाधिवेशन गर्नै नहुने बताएका छन् । पार्टी केन्द्रीय कार्यालय सानेपामा केन्द्रीय समितिको बुधबारको बैठकको बैठकमा शाहीले विशेष महाधिवेशन गर्न नहुने धारणा राखेका हुन् । उनले ५४ प्रतिशत महाधिवेशन प्रतिनिधिले विशेष महाधिवेशन माग गर्दै हस्ताक्षरसहित निवेदन बुझाए पनि शाहीले त्यसमा शंका गरे ।
‘विशेष महाधिवेशनका पक्षमा ५४ प्रतिशत हस्ताक्षार झुटो हुन सक्छ, मैले बुझेको विशेष महाधिवेशन भनेको हाम्रो समय हुँदाहुँदै नेतृत्व सक्षम भएन भनेर हटाएर अर्को ल्याउने भन्ने कुरा होला । आज त हाम्रो करिब–करिब सबै समय अवधि सकिएको अवस्था छ ।’
कांग्रेसमा फागुन २१ का लागि तय भएको प्रतिनिधिसभाको निर्वाचनअघि महाधिवेशन गर्ने कि निर्वाचनपछि महाधिवेशन गर्ने भन्ने विवाद छ । यसैमा केन्द्रित भएर महामन्त्री गगनकुमार थापाले पुसमा र सह–महामन्त्री महेन्द्र यादवले वैशाखमा महाधिवेशन गर्ने प्रस्ताव गरेका छन् । ‘एकले अर्कालाई हामीले ध्वाँस दिने, धम्काउने तर्साउने मात्र कुरा गरिरहेका छौँ,’ उनले भने, ‘यसले हामीलाई कुन ठाउँमा पु¥याउँछ ।’ शाहीले आफूले गरेको दुईवटा प्रस्तावको बीचबाटै समाधान खोज्नुपर्नेमा जोड दिए ।