शे–फोक्सुण्डो जाने पदमार्ग र ताल नजिकको बस्ती विकास सँगसँगै

डोल्पाको शे–फोक्सुण्डो पुग्ने पर्यटकलाई सहजताका लागि दुईवटा आयोजना सँगसँगै अघ बढाएको छ । यो आर्थिक बर्षदेखि डोल्पा सदरमुकामदेखि शे–फोक्सुण्डो तालसम्म पुग्ने पदमार्ग स्तरोन्नति र ताल नजिकको बस्तीमा थप पूर्वाधार थप्दै बस्ती विकासको काम सँगसँगै अघि बढाईएको हो । यी दुई योजना निर्माणपछि पर्यटकहरुलाई थप सहजता मिल्नेछ ।
आयोजनाअन्तर्गत डोल्पाको साङ्टादेखि फोक्सुण्डो तालसम्म पुग्ने पदमार्गको स्तरोन्नति, डोल्पा सदरमुकाम दुनैदेखि पदमार्गको प्रत्येक दुई किलोमिटर दुरीमा १६ वटा प्रतिक्षालय निर्माण गर्ने योजना छ । पैदल यात्राका क्रममा पर्यटकलाई आराम गर्नका लागि प्रतिक्षालय बनाउन लागिएको हो । अहिलेकै पदमार्गलाई जोखिम तथा अप्ठ्यारो भएका ठाउँमा सहज बनाउनेगरि स्तरोन्नति गर्न थालिएको हो । हाल उक्त पर्यटकीय गन्तव्यसम्म सडक निर्माण भईनसकेकाले डोल्पाको सदरमुकामदेखि शे–फोक्सुण्डो जान दुई दिन पैदल यात्रा गर्नुपर्छ ।
यो सँगसँगै तालको छेउमा रहेको रिङ्गिबो अर्थात रिङ्ग बस्तीलाई पनि थप विकास गर्न थालिएको छ । फोक्सुण्डो जाने पर्यटकका लागि यो आवासीय गाउँ पनि हो । पर्यटकहरु फोक्सुण्डो ताल अवलोकनका क्रममा यो बस्तीमा बस्छन् । आयोजनाअन्तर्गत बस्तीको भित्री बाटो विस्तार, ढल निकास, बस्तीमा रहेका दुई वटा विद्यालयको पूर्वाधार निर्माण, दुई वटा ट्रस पुल निर्माण, गुम्बामा खानेपानी धारा निर्माण जस्ता काम गरिनेछ । यस्तै फोक्सुण्डो तालको अवलोकन गर्न भ्यू पोइन्टसम्मको पदमार्ग र प्रतिक्षालयपनि निर्माण गरिनेछ । रिङ्ग बस्तीमा संग्रालय, पार्क तथा बस्तीको जोखिम कम गर्न तटबन्धन निर्माण लगायतका कामहरु गरिनेछ ।
शे–फोक्सुण्डो गाउँपालिका–८ स्थित राष्ट्रिय निकुञ्ज क्षेत्रमा पर्ने रिङ्ग गाउँ नेपालको प्राचिन बस्तीमध्येको एक हो । यो गाउँमा करिब दुई सयको हाराहारीमा मानिस बस्छन् । समुन्द्री सतहदेखि ३ हजार ६६० मिटर उचाईमा रहेको यो बस्ती नेपालका अग्ला स्थानमा रहेका बस्तीमध्येको पनि एक हो । बस्तीमा तिब्बतियन संस्कृति बढी झल्किन्छ ।
गत शुक्रबार कर्णाली प्रदेशका मुख्यमन्त्री यामलाल कँडेलले बस्ती विकास र पदमार्ग स्तरोन्नति आयोजनाको शिलान्यास गरेका छन् । शिलान्यासका क्रममा मुख्यमन्त्री कँडेलले निर्माण व्यवसायीलाई जिम्मेवार भएर काम गर्न आग्रह गरे । ठेक्का लिने तर काम नगर्ने प्रवृत्तिको अन्त्य गरे निर्माण व्यवसायीलाई प्रोत्साहन गरिने उनले बताए । ‘काम लिने तर काम नगर्ने प्रवृत्ति अन्य गर्नुस्, कर्णाली समृद्धिको जिम्मेवारी तपाईहरुको हातमा पनि छ,’ मुख्यमन्त्री कँडेलले भने, ‘जिम्मेवारीअनुरुप निर्वाध रुप्मा काम गरेर कर्णालीको समृद्धिमा सघाउनुस्, सरकार तपाईको साथमा छ ।’ सरकारले निर्माण व्यवसायीलाई कुनै समस्यामा नपार्ने पनि उनले आश्वासन दिएका छन् । उनले पदमार्ग स्तरोन्नति र बस्ती विकास भईसकेपछि आन्तरिक तथा बाह्य पर्यटकलाई फोक्सुण्डो अवलोकनमा थप आकर्षित गर्ने विश्वास व्यक्त गरे ।
यो कार्यक्रमका लागि लागि प्रदेश सरकारले चालु आर्थिक वर्ष (२०८२÷०८३) मा २१ करोड १२ लाख रुपैयाँ विनियोजन गरेको छ । पूर्वाधार विकास कार्यालय डोल्पा र निर्माण व्यवसायी श्रेया–गुठीचौर जेभी काठमाडांैबीच निर्माण सम्झौता भएर काम अघि बढेको हो । सम्झौता अनुसार २०८४ असार मसान्तसम्म आयोजना सम्पन्न गरी हस्तान्तरण गरिसक्नुपर्नेछ ।