जेलबाट भागेका करणी मुद्दाका अभियुक्त पक्राउ

जेन–जी आन्दोलनका क्रममा केन्द्रीय कारागार सुन्धाराबाट भागेका एक कैदी डोल्पामा पक्राउ परेका छन् । जबर्जस्ती करणी मुद्दामा फरार रुकुम पूर्वको पुथाउत्तरगंगा–२ मैकोट बस्ने ३० बर्षीय बीरबहादुर विक पक्राउ परेका हुन् ।
जिल्ला प्रहरी कार्यालय डोल्पाका प्रमुख प्रहरी नायब उपरीक्षक रुकबहादुर खड्काले पक्राउ परेका विकलाई कारागार कार्यालय डोल्पामा बुझाईएको जानकारी दिए । ठूलभेरी नगरपालिका–४ मा पर्ने धुपीचौरमा स्थानीय सिर्जना विकको घरमा झैझगडा भएको उजुरी आएपछि प्रहरी घटनास्थलमा पुग्दा अभियुक्त विक टाउकोमा चोट लागेको अवस्थामा भेटिएको उनले बताए ।
जिल्ला अस्पतालमा ल्याई उपचारपछि सोधपुछ गर्दा उनले आफू जबर्जस्ती करणी मुद्दामा कैद भुक्तान गरिरहेको अवस्थामा जेनजी आन्दोलनका क्रममा भागेको प्रहरीसँग बताएका थिए । विकविरुद्ध रुकुम पूर्व जिल्ला अदालतले २०७८ फागुन २ गते १२ वर्ष कैद र ४० हजार जरिवाना गराउने फैसला गरेको
थियो ।