स्ववियु सदस्य उपाध्यायले दिए राजीनामा

मध्यपश्चिम विश्वविद्यालयअन्तर्गत केन्द्रीय क्याम्पसको स्वतन्त्र विद्यार्थी युनियन (स्ववियु) का सदस्य दीपक उपाध्यायले राजीनामा दिएका छन् । उनले सोमबार स्ववियु अध्यक्ष विवेक खड्कालाई राजीनामा बुझाएका हुन् ।
उनी २०८१ चैत १८ गते सम्पन्न स्ववियुको निर्वाचनबाट समानुपातिकतर्फ सदस्य पदमा निर्वाचित भएका थिए । उनी नेपाली कांग्रेसनिकट नेपाल विद्यार्थी संघका नेता हुन् । उनले आफ्नो व्यक्तिगत कारणले राजीनामा दिएको बताएका छन् ।
‘विद्यार्थीको आवाज बुलन्द गर्न, शिक्षामा सुधार ल्याउन र संस्थाको मर्यादा उकास्न सक्दो योगदान दिने उद्देश्यानुरुप यो जिम्मेवारी ग्रहण गरेको थिएँ,’ उपाध्यायले भने, ‘यस अवधिमा मैले सिकेको, देखेको र भोगेको अनुभव मेरो जीवनका लागि अत्यन्तै मूल्यवान् सम्पत्ति बनेको छ, तर पछिल्लो समय व्यक्तिगत कारणले गर्दा यस भूमिकामा आवश्यक समय, ऊर्जा र समर्पण दिन नसक्ने परिस्थिति सिर्जना भएकोले सदस्य पदबाट राजीनामा दिएको हो ।’
स्ववियु सदस्यबाट अलग भए पनि नेवि संघका तर्फबाट विद्यार्थीका हकअधिकारका विषयमा वकालत गर्ने उनले बताए बताए ।