सुर्खेतमा नेपाली कम्युनिस्ट पार्टीको एकता सन्देश सभाः को नेताले के भने ?

नेपाली कम्युनिस्ट पार्टीले शनिबार सुर्खेतमा ‘एकता सन्देश सभा’ सम्पन्न गरेको छ । साविक नेकपा (माओवादी केन्द्र), नेकपा (एकीकृत समाजवादी) लगायत १० वटा भन्दा बढी वाम घटकहरुबीच एकता गरी बनेको नेपाली कम्युनिस्ट पार्टीले देशभर सन्देश सभा गरेको थियो । अन्य प्रदेशहरुमा सकाएर अन्तिममा शनिबार सुर्खेतमा सभा आयोजना गरिएको थियो । सभामा संयोजक पुष्पकमल दाहाल प्रचण्डा, सहसंयोजक माधवकुमार नेपाल, वरिष्ठ नेताहरु झलनाथ खनाल, वामदेव गौतम, भिम रावल, नारायणकाजी श्रेष्ठ लगायतका नेताहरु सुर्खेत आएका थिए ।
एकता सन्देश सभालाई सम्बोधन गर्दै नेपाली कम्यूनिस्ट पार्टी (नेकपा)का संयोजक प्रचण्डले सुदूरपश्चिम र कर्णाली प्रदेशमा एक नम्बर पार्टी बन्ने दावी गरेका छन् । उनले दुई प्रदेशमा भएका एकतासभाले देशमा समाजवादी क्रान्तिको सन्देश दिएको बताए । ‘नेकपाले जारी राखेका एकता सभाहरु प्रचारात्मक नभएर विगतका कमीकमजोरीका विषयमा आत्मसमिक्षा र आत्मआलोचना गरेर आगामी दिनमा नेपाली जनतासँग एकाकार भएर सुशासनयुक्त, भ्रष्टाचारमुक्त र आर्थिकरुपले समृद्ध, सामाजिक विभेदको अत्य गरी सामाजिक न्यायसहितको समाज निर्माण गर्ने लक्ष्य हाम्रो हो ।’ प्रचण्डले भने ।
विगतका कमजोरीहरु अब नदोहोरिने उनले दाबी गरे । उनले नेपालमा कम्युनिष्ट घटकहरु एकत्रित हुन विगतदेखिकै प्रयास भएको बताए । जेन–जी आन्दोलनलाई सही थियो भन्ने पार्टी नै नेकपा भएको उल्लेख गर्दै प्रचण्डले पछिल्लो सरकार र जेन–जीबीच भएको सम्झौता आफूहरुकै नीति तथा कार्यक्रमसँग सम्बन्धित भएको दाबी गरे ।
नेपाली कम्युनिस्ट पार्टीका सहसंयोजक माधवकुमार नेपालले सम्बोधनका क्रममा नेकपा इमानदारहरुको पार्टी भएको दावी गरेका छन् । भ्रष्टाचार र स्वार्थी प्रवृत्तिको अन्त्य नगरी देशलाई समृद्ध बनाउन नसकिने उनले बताए । ‘भ्रष्टाचार र स्वार्थी प्रवृत्तिलाई अन्त्य गरिएन भने तथा साझा भावना अगाडि बढाउन सकिएन भने देशलाई अगाडि बढाउन सकिँदैन, त्यसैले हामीले विगतका कमजोरी स्वीकार गर्दै इमानदार तरिकाले काम गर्ने सोचेर नै पार्टी एकता गरेका हौँ ।’ उनले भने ।
पूर्वप्रधानमन्त्री समेत रहेका नेकपाका नेता नेपालले कम्युनिस्ट नेतृत्वको सरकारले गरेका कामहरुको बचाउ गरेका छन् । उनले आफू र पुष्पकमल दाहाल ‘प्रचण्ड’ प्रधानमन्त्री हुँदा धेरै राम्रा कामहरु भएको दाबी गरे । ‘म र प्रचण्डजी प्रधानमन्त्री भएका बेला राम्रा काम पनि गरेका छौँ, तर केही गरेनन् भन्छन् ।’ उनले भने ।
मध्यपहाडी राजमार्ग, कर्णाली राजमार्ग, जनता आवास कार्यक्रम र युवालाई रोजगारी दिने जस्ता महत्वपूर्ण कामहरु कम्युनिस्ट सरकारकै पालामा भएको उनले बताए । उनले जनअपेक्षा अनुसार काम गर्न नसकिएको पनि स्वीकारे । उनले भने, ‘जति गर्न सक्नुपथ्र्यो त्यो नभएका होलान्, तर केही नभएको होइन । हामीले शिर निहुराउनुपर्ने अवस्था छैन ।’
नेपाली कम्युनिस्ट पार्टीका नेता वामदेव गौतमले मुलुकमा समाजवाद निर्माण गर्न नसके आफूहरुलाई जेल हाल्न जनतालाई आग्रह गरेका छन् । एकता सन्देश सभालाई सम्बोधन गर्दै गौतमले यस्तो बताएका हुन् । उनले अब नेताहरुलाई भाग्ने छुट नभएको बताए । ‘हामीले समाजवाद निर्माण गर्न सकेनौँ भने तपाईंहरुले हामीलाई जेलमा लगेर कोचिदिनुहोला, हामीलाई अब भाग्ने छुट छैन ।’ उनले भने ।
गौतमले जनतालाई भ्रममा नपार्न दलहरुलाई नेतृत्वलाई चेतावनी दिए । केही दलहरुले जनतालाई ढाँट्नका लागि मात्र समावाद भनिरहेको बताउँदै उनले अब ढिला नगरी समाजवाद निर्माणतर्फ लाग्दै मुलुकलाई समृद्ध बनाउनुपर्ने औंल्याए । सम्बोधनका क्रममा नेता गौतमले पछिल्लो समय चर्चामा रहेको युवाहरुको ‘जेनजी’ आन्दोलन केपी ओलीकै कारण भएको टिप्पणी गरे ।
नेतृत्वको कार्यशैलीप्रति असन्तुष्टि जनाउँदै उनले संविधानको मर्मअनुसार अघि बढ्न सुझाव दिए । नेपाली कम्युनिस्ट आन्दोलन देशको सबैभन्दा ठुलो शक्तिका रूपमा स्थापित भएको उल्लेख गर्दै उनले अबको बाटो समृद्ध समाजवादको विकास हुनुपर्नेमा जोड दिए ।
यस्तै कम्युनिस्ट पार्टीका नेता तथा पूर्वप्रधानमन्त्री झलनाथ खनालले देशमा नेपाली विशेषताको समाजवाद ल्याउनुपर्ने बताएका छन् । ‘एकता सन्देश सभा’ लाई सम्बोधन गर्दै नेता खनालले देशलाई समाजवादतर्फ लैजानु नै अबको मुख्य विकल्प रहेको बताएका हुन् । सम्बोधनका क्रममा नेता खनालले मुलुकमा विदेशीहरुको हस्तक्षेप बढेको र राष्ट्रिय स्वाधिनतामाथि प्रश्न उठेको टिप्पणी गरे । ‘पुँजीवादको अन्त्य र भ्रष्टाचारको अन्त्य गर्न सबै कम्युनिस्टहरू मिलेर समाजवाद स्थापना गर्नुको विकल्प छैन ।’ उनले भने ।
शिक्षा र स्वास्थ्य क्षेत्रमा अपेक्षित रुपान्तरण गर्न नसकिएको स्वीकार गर्दै खनालले सबै जनताले गाँस, बास र कपाससहित शिक्षाको सहज पहुँच पाउने नेपाल निर्माण गर्न समाजवाद अपरिहार्य रहेको बताए । उनले नेकपा एमालेलाई पनि एकता र समाजवादको बाटोमा आउन आग्रह गरे । एमाले पङ्क्तिलाई लक्षित गर्दै उनले भने– ‘म एमाले महाधिवेशनमा भएका साथीहरुलाई भन्छु, आउनुहोस्, एकै बाटोमा अघि बढौँ । हामी एउटै कम्युनिस्ट शक्ति बनेर अघि बढ्नुपर्छ ।’
सभालाई सम्बोधन गर्दै अर्का नेता नारायणकाजी श्रेष्ठले नेकपालाई घुस नखानेहरुको पार्टी बनाउने बताए । नेकपालाई घुस नखानेहरुको पार्टी भनेर चिनाउनेगरि काम गर्ने बताए । ‘भ्रष्टाचार नगर्नेहरुको पार्टी बनाएर सबैलाई एकताबद्ध गराउनुपर्ने छ, मजदुर, जनजाति, दलितलाई समेत एकताबद्ध गरेर काम गरिनेछ ।’ उनले भने ।
श्रेष्ठले माओवादी सरकारमा हुँदा सुशासनलाई पहिलो प्राथमिकतामा राखेर काम गरेको तर कांग्रेस र एमालेलाई त्यो नरुचेको बताए । ‘कांग्रेस र एमालेलाई सुशासन रुचेन, जसका कारण नेपालमा जेनजी आन्दोलन सुरु भएको हो ।’ उनले भने ।
अर्का नेता डा.भीम रावलले पूर्वप्रधानमन्त्री एवम् एमाले अध्यक्ष केपी शर्मा ओलीको कडा आलोचना गरे । एकता सन्देश सभामा बोल्दै उनले नयाँ पुस्ता (जेनजी) को आवाज सुन्नुको साटो ओली दमनमा उत्रिएको र आन्दोलन चर्किएपछि भागेको उनले टिप्पणी गरे । ‘सिंहदरबारमा आगो लाग्दा प्रधानमन्त्री को थियो ? देश सङ्कटमा पर्दा वा आगो लागेका बेला भाग्ने प्रवृत्ति नेतामा हुनु ठिक हो ?’ उनले ओलीतर्फ प्रश्न गरे ।
ओलीप्रति आक्रामक रुपमा प्रस्तुत भएका रावलले अगाडि भने, ‘केपी ओलीलाई देशको नेता हुँ भन्नु लाज लाग्नुपर्ने हो, देशमा आगो लागेका बेला भाग्ने ? जेनजीका माग सुन्नुपर्नेमा उल्टै दमन गर्ने अनि आन्दोलन भएपछि भाग्ने ? हाम्रा कलिला युवाहरूको आवाजले केपीजी भाग्नुभयो, यो लज्जास्पद र शर्मनाक भयो । अझ अहिले पनि म शक्तिशाली हुँ भन्न सुहाउँदैन ।’
नेता रावलले आफ्नो सम्बोधनका क्रममा कर्णाली प्रदेशका जल्दाबल्दा समस्याहरु पनि उठाए । उनले कर्णाली राजमार्गको दयनीय अवस्था सुधार हुन नसकेको भन्दै चिन्ता व्यक्त गरे । कर्णालीको स्याउ, यार्सागुम्बा र जडीबुटीको सही सदुपयोग र बजारीकरण हुन नसकेको उनको भनाइ थियो । विशेष गरी अपर कर्णाली जलविद्युत आयोजनाको सन्दर्भमा बोल्दै उनले भारतीय कम्पनी जीएमआरको आलोचना गरे । ‘अपर कर्णालीलाई जीएमआरको जिम्मा लगाईयो तर अहिलेसम्म काम भएको छैन, काम नगरी ओगटेर राख्नु भनेको कर्णाली र सुदूरपश्चिमका जनतालाई धोका दिनु हो ।’ रावलले भने ।

‘कुलमानको बुद्धि फिरोस्’

नेपाली कम्युनिस्ट पार्टीका संयोजक पुष्पकमल दाहाल प्रचण्डले कुलमान घिसिङले आफूले लगाएको गुण बिर्सिएको बताएका छन् । शनिबार सुर्खेतमा आयोजित पार्टीको एकता सन्देश सभालाई सम्बोधन गर्दै उनले आफू प्रधानमन्त्री हुँदा घिसिङलाई विद्युत प्राधिकरणको कार्यकारी निर्देशक बनाएको र त्यो गुण उनले भुलेको बताए ।
“कुलमानले जुन थालमा खाए त्यही थालमा प्वाल पार्न थाले, लोडसेडिङबाट आक्रान्त भएको नेपाललाई लोडसेडिङमुक्त बनाउने ऐतिहासिक कार्य त हामीले गरेकै हो,” प्रचण्डले भने, “त्योबेला हामीले उनलाई दुई–दुई पटक ल्याएर कार्यकारी निर्देशक बनाएका हौं, अहिले कुलमानले गुन बिर्सेर जुन थालमा खाए त्यहीँ थालमा छेद हाल्न खोजेका छन् ।”
उनले आफ्नो विरुद्धमा नउभिन पनि घिसिङलाई आह्वान गरे । घिसिङ आफ्नो पछाडि बेइमानीका साथ हिँडेर पार नपाउने प्रचण्डले बताए । “तिनले त्यसो नगरुन भन्न चाहन्छु, कुलमानको बुद्धि फिरोस । यस्तो बैगुनी भएर तिनले पार पाउने छैनन्,” प्रचडले भने, “नेपाली जनताले यसो गरे भने तिनलाई धेरै माफ दिन्छन् जस्तो लाग्दैन ।”