कालिकाेट । देशभरका बालबालिकाको स्वास्थ्य सुदृढीकरण गर्ने उद्देश्यले भिटामिन ‘ए’ तथा जुकाको औषधि खुवाउने राष्ट्रिय अभियान आइतबारदेखि सुरु गरिएको छ । यस अभियान अन्तर्गत स्वास्थ्य स्वयंसेविकाहरूले बालबालिकालाई भिटामिन ‘ए’ र जुकाविरुद्धको औषधि खुवाएका छन् । स्वास्थ्य कार्यालयका अनुसार यो अभियान आइतबार र सोमबार सञ्चालन हुने छ, जसअन्तर्गत ६ महिनादेखि ५ वर्षसम्मका करिब दश हजार बालबालिकालाई भिटामिन ‘ए’ क्याप्सुल र जुकाको औषधि खुवाइने लक्ष्य राखिएको छ । बालबालिकामा कुपोषण न्यूनीकरण, रोगप्रतिरोधात्मक क्षमता वृद्धि तथा जुकाको संक्रमण नियन्त्रण गर्ने उद्देश्यले हरेक वर्ष यो अभियान सञ्चालन हुँदै आएको छ ।
खाँदबारी र व्यास नगरपालिकाका विभिन्न स्थानमा खटिएका महिला स्वास्थ्य स्वयंसेविकाहरूले घरदैलोमै पुगेर बालबालिकालाई औषधि खुवाउने काम गरिरहेका छन् । उनीहरूले अभिभावकलाई बालबालिकाको पोषण, सरसफाइ र स्वास्थ्यबारे जानकारी समेत प्रदान गरिरहेका छन् । स्थानीय तह र स्वास्थ्य संस्थाहरूको समन्वयमा अभियानलाई प्रभावकारी रूपमा सञ्चालन गरिएको जनाइएको छ । स्वास्थ्यकर्मीहरूका अनुसार भिटामिन ‘ए’ बालबालिकाको दृष्टि, रोग प्रतिरोधात्मक क्षमता र शारीरिक विकासका लागि अत्यन्त महत्वपूर्ण हुन्छ । त्यस्तै, जुकाको औषधिले बालबालिकाको शरीरमा हुने परजीवी संक्रमण हटाएर पोषण तत्वको अवशोषणमा सुधार ल्याउँछ ।
अभियानमा सहभागी अभिभावकहरूले यस्तो कार्यक्रमले बालबालिकाको स्वास्थ्यमा सकारात्मक प्रभाव पार्ने विश्वास व्यक्त गरेका छन् । उनीहरूले सरकारले सञ्चालन गर्दै आएको यस कार्यक्रमलाई निरन्तरता दिनुपर्ने आवश्यकता औँल्याएका छन् । स्वास्थ्य अधिकारीहरूले लक्षित उमेर समूहका सबै बालबालिकालाई अनिवार्य रूपमा भिटामिन ‘ए’ र जुकाको औषधि खुवाउन अभिभावकलाई आग्रह गरेका छन्। साथै, औषधि खुवाउँदा बालबालिकाको स्वास्थ्य अवस्थाबारे जानकारी दिन र कुनै समस्या देखिएमा नजिकको स्वास्थ्य संस्थामा सम्पर्क गर्न सुझाव दिइएको छ । सरकारले राष्ट्रिय स्तरमै सञ्चालन गर्दै आएको यस अभियानले बालबालिकामा हुने कुपोषण, अन्धोपन तथा अन्य स्वास्थ्य समस्याहरू न्यूनीकरण गर्न महत्वपूर्ण योगदान पुर्याउँदै आएको छ । स्वास्थ्य स्वयंसेविकाहरूको सक्रियता र स्थानीय तहको सहयोगले अभियान सफलतापूर्वक सञ्चालन भइरहेको जनाइएको छ ।