🌧️ पानी पर्‍यो, कांग्रेसको बन्द सत्र रोकियो ! भोलि नयाँ नेतृत्वका लागि मतदान

काठमाडौं । नेपाली कांग्रेसको १५औँ महाधिवेशनको चौथो दिन आज हावाहुरीसहितको भारी वर्षाका कारण बन्द सत्र प्रभावित भएको छ।बिहान साढे ११ बजेदेखि बन्द सत्र सुरु गर्ने तयारी गरिएको भए पनि अचानक मौसम बिग्रिएपछि खुलामञ्चमा महाधिवेशन प्रतिनिधिहरूको उपस्थिति प्रभावित भएको हो। कांग्रेसले १५औँ महाधिवेशनको बन्द सत्र काठमाडौंको खुलामञ्चमा आयोजना गरिरहेको छ। तर, वर्षाका कारण प्रतिनिधिहरू समयमै कार्यक्रमस्थल पुग्न नसकेपछि निर्धारित समयमा कार्यक्रम सुरु हुन सकेन। आजको बन्द सत्रमा महाधिवेशन प्रतिनिधिहरूले विभिन्न राजनीतिक, संगठनात्मक तथा आर्थिक प्रस्ताव र प्रतिवेदनमाथिको छलफल टुंग्याएर पारित गर्ने तयारी गरिएको छ।

सभापति गगनकुमार थापाले प्रस्तुत गरेको ‘राष्ट्रिय पुनर्जागरण र समुन्नति’सम्बन्धी राजनीतिक प्रस्ताव, उपसभापति विश्वप्रकाश शर्माको ‘राजनीतिक संस्कृतिको क्षय र युगानुकूल रूपान्तरणको अभिभारा’सम्बन्धी समसामयिक प्रस्ताव, महामन्त्री गुरुराज घिमिरेको संगठनसम्बन्धी प्रतिवेदन तथा कोषाध्यक्ष उमेश श्रेष्ठको आर्थिक प्रतिवेदनमाथि प्रतिनिधिहरूले छलफल गरिरहेका छन्।

सोमबारदेखि जारी छलफलमा महाधिवेशन प्रतिनिधिहरूले कांग्रेसको आगामी राजनीतिक दिशा, पार्टी संगठनलाई थप मजबुत बनाउने उपाय, राजनीतिक संस्कृतिमा सुधार तथा आर्थिक व्यवस्थापनलगायतका विषयमा आफ्ना सुझाव र धारणा राख्दै आएका छन्। वर्षाका कारण केही ढिलाइ भए पनि बाँकी रहेका धारणा तथा सुझावलाई समेट्दै प्रस्ताव र प्रतिवेदन पारित गर्ने प्रक्रिया अघि बढाउने कांग्रेसको तयारी छ। बन्द सत्रको छलफल सकिएपछि सभापति गगनकुमार थापाले महाधिवेशन प्रतिनिधिहरूलाई सम्बोधन गर्ने कार्यक्रम रहेको छ।

अब कांग्रेसको ध्यान नेतृत्व चयनतर्फ

राजनीतिक, संगठनात्मक र आर्थिक प्रतिवेदन पारित भएपछि कांग्रेस महाधिवेशन नेतृत्व चयनको निर्णायक चरणमा प्रवेश गर्नेछ। १५औँ महाधिवेशनमा सभापति पदका लागि गगनकुमार थापा, श्यामकृष्ण खड्की र किशोरसिंह राठौरले उम्मेदवारी दिएका छन्। उम्मेदवारी दर्ता भइसकेकाले अब कांग्रेसको नयाँ नेतृत्व कसको हातमा पुग्छ भन्ने विषयमा सबैको ध्यान केन्द्रित भएको छ।