चितवन । चितवनको इच्छाकामना गाउँपालिका–६ स्थित जलविरे झरना नजिकै कार दुर्घटना हुँदा एक भारतीय नागरिकको मृत्यु भएको छ।
जलविरे (लामो झरना) घुमेर फर्किने क्रममा भारतीय नम्बर प्लेटको कार अनियन्त्रित भई खोलामा खस्दा चालकको घटनास्थलमै मृत्यु भएको हो। प्रहरीका अनुसार डब्लुबी ०२ एपी ३४५८ नम्बरको उक्त कार दुर्घटनामा परेको थियो। दुर्घटनामा मृत्यु हुनेमा भारतको पश्चिम बङ्गालस्थित कालिम्पोङका ४१ वर्षीय सायन्तन गायेन रहेका छन्।
घटनास्थलमा फेला परेको राहदानीका आधारमा मृतकको पहिचान खुलेको जिल्ला प्रहरी कार्यालय चितवनले जनाएको छ। प्रारम्भिक अनुसन्धानअनुसार दुर्घटनाका बेला कारमा चालक मात्रै सवार थिए। दुर्घटना के कारणले भएको हो भन्नेबारे प्रहरीले थप अनुसन्धान गरिरहेको छ। घटनाको विस्तृत विवरण आउन बाँकी रहेको प्रहरीले जनाएको छ।
प्रकाशित मिति : २०८३ कात्तिक १८ गते बुधबार