चेसमा पुरुषोत्तमको अग्रता

नेपाल बुद्धिचाल महासंघको आयोजनामा २४औं खुला तथा नवौं महिला राष्ट्रिय ‘बी’ चेस च्याम्पियनसिप छनोट प्रतियोगिताको दोस्रो दिन तेस्रो चरणका खेल सम्पन्न भएका छन्। राष्ट्रिय ‘बी’ चेस छनोट प्रतियोगितामा जम्मा ६० पुरुष र १८ महिला राष्ट्रिय शीर्ष खेलाडीबीच चौथो चरणको खेल चलिरहेको छ।

भक्तपुर जिल्ला बुद्धिचाल संघको सह आयोजना एवं स्थानीय व्यवस्थापनमा सञ्चालन भएको प्रतियोगितामार्फत दुवै समूहका ९/९ जना खेलाडी जेठ १९ देखि काठमाडौंमा सुरु हुने राष्ट्रिय प्रतियोगितामाका लागि छनोट हुनेछन्।

सूर्य विनायक रिसोर्ट गपली भक्तपुरमा सम्पन्न तेस्रो चरणको खेलपश्चात् यु १५ राष्ट्रिय च्याम्पियन पुरुषोत्तम सिलवाल, नेपालका पूर्वच्याम्पियन केशव श्रेष्ठ र उदीयमान खेलाडी सिएम मिलन लामा ३/३ अंक जोडेर अग्रस्थानमा उभिएका छन्।

पुरुषोत्तमले जनकराज जोशी, नवीन तण्डुकार र राजन सुवेदी माथि विजय हासिल गरेका छन्। सिएम केशव श्रेष्ठले आशानारायण लवट, सुदीप तामाङ र सोम आलेमाथि जित दर्ता गरेका छन् भने सिएम लामाले अविक शाह, गणेश दुवाल र सजिन महर्जनलाई पराजित गरेका छन्।

सूर्यविनायक नगरपालिकाको प्रायोजन रहेको प्रतियोगितामा एआइएम सुश्रुत दाहाल, प्रेमकृष्ण महर्जन, सिएम पुरुषोत्तम चौलागाईं, राजीव कार्की, आशिष फुँयाल, निकेन कुसाथा, सिएम कृष्ण थापा र प्रकाशचन्द्र नेपाल २ जित र एक बराबरी खेलबाट २.५ अंक प्राप्त गर्दै संयुक्त दोस्रो स्थानमा सुरक्षित छन्।

प्रतियोगिताको चौथो चरणमा मिलन र केशव, पुरुषोत्तम र निकेन, आशिष र सुश्रुत, प्रेम र प्रकाश, गणेश र राजीव प्रतिस्पर्धा गरिरहेका छन्। महिलातर्फ कोसी प्रदेश च्याम्पियन कृतिसरा अधिकारी र पोखराकी पूजा भण्डारी शतप्रतिशत जित निकाल्दै ३ /३ अंकका साथ पहिलो स्थानमा रहन सफल भएका छन्।

कृतिसराले नमन सेढाई, लक्ष्मी कँडेल र सिन्दिरा जोशीमाथि जित निकालेकी थिइन भने पूजाले एन्जेल महर्जन, पुनम प्रसाईं र विनीता कपालीलाई पराजित गरेकी थिइन्। चौथो चरणको खेल कृतिसरा र पूजाको बीचमा चलिरहेको छ।

प्रतियोगिताका संयोजक एवं अन्तर्राष्ट्रिय निर्णायक निरञ्जन प्रजापतिले ९० मिनेट ३० सेकेन्ड इन्क्रिजमेन्ट क्लासिकल खेलमा डाइरेक्ट इन्काउन्टर, बुचोल्स वान टु , मोस्ट विन नियम लागू रहने जानाए। उनले पुरुषतर्फ ९ चरण र महिलातर्फ ७ चरणको खेल हुने बताए।