नेपाल एटिएफ यु–१२ टेनिसमा पराजित

नेपाल घरेलु मैदानमा जारी एटिएफ यु–१२ टेनिस टिम प्रतियोगिता (दक्षिण एसियाली क्षेत्रीय छनोट) मा पराजित भएको छ। सातदोबाटोस्थित टेनिस कम्प्लेक्समा जारी प्रतियोगितामा मंगलबार नै नेपालको बोइज र गल्र्स टिम पराजित भएको हो।

नेपाल टेनिस संघको आयोजनामा भइरहेको प्रतियोगितामा नेपाल बोइजमा पाकिस्तानसँग र गल्र्समा भारतसँग पराजित हुन पुग्यो। यसअघि पहिलो दिन पनि नेपालको बोइज टिम श्रीलंकासँग ३–० तथा गल्र्स टिम बंगलादेशसंग २–० ले पछि परेको थियो। दोस्रो दिन पनि नेपालले बोइजमा पाकिस्तानसँग ३–० को हार बेहोर्‍यो।

सिंगल्समा नेपालका विश्वविशेष डल्लाकोटी रसिद अलीसँग ६–३ र ६–० पराजित भए। अर्को सिंगल्समा मुहम्मद सायनले नेपालका निश्चल ज्ञवालीलाई ६–१ र ६–१ को सोझो सेटमा हराए। डबल्समा सायन र जुनैद खान मुहम्मदको जोडीले नेपालका विश्व र साहनवाज आलमको जोडीलाई सीधा सेटमा ६–१ र ६–० ले हरायो। बोइजमै भारतले माल्दिभ्स तथा श्रीलंकाले भुटानलाई समान ३–० को नतिजामा पन्छाए ।

भारतले गल्र्समा दोहोरो जित निकालेको थियो। यस क्रममा गल्र्समा भारतले नेपालमाथि ३–० को जित दर्ता गर्‍यो । सिंगल्समा सृष्टि किरणले नेपालकी आयुशा जिसीलाई ६–० र ६–० तथा खुसी कडियनले नेपालकी अनुश्री धोजुलाई ६–२ र ६–० को सोझो सेटमा पन्छाए। डबल्समा सरेना घलोट र सृष्टि किरणको जोडीले नेपालका अनुश्री ध्वजु र सारा पन्तको जोडीलाई ६–१ र ६–० ले पराजित गर्‍यो।